ކުރީގެ ރައީސް އަބްދުﷲ ޔާމީންގެ ޕީއެންއެފްއިން މިރޭ އާޓިފިޝަލް ބީޗް ސަރަހައްދުގައި ބާއްވާ ޖަލްސާއަށް ކަރަންޓު ދޫކުރުމަށް ސްޓެލްކޯއިން ދެކޮޅު ހަދާފައިވާ ކަމަށް އެ ޕާޓީން ބުނެފި އެވެ.

ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވީ "ރީސެޓު"ގެ ނަމުގައި ބޭއްވުމަށް ހަމަޖެހިފައިވާ އެ ޖަލްސާއަށް ތައްޔާރުވުމުގެ ގޮތުން މަސައްކަތް ކުރަމުން ދަނިކޮށް ސްޓެލްކޯއިން އެ ސަރަހައްދަށް ކަރަންޓު ދިނުމަށް ދެކޮޅު ހަދާފައިވާ ކަމަށެވެ.

މަލީހު ތުހުމަތު ކުރެއްވި ގޮތުގައި އެކަމަކީ ސީދާ ރައީސް މުހައްމަދު މުއިއްޒުގެ އިރުޝާދުގެ ދަށުން ޕީއެންއެފްއަށް ޖެއްސުން ކުރުމަށް ސަރުކާރުން ކުރަމުންދާ ކަމެކެވެ.

"މީގެ ދެ ދުވަސް ކުރިން ވެސް އެތަނުގައި އިވެންޓެއް ބޭއްވި. ނަމަވެސް މިހާރު ސްޓެލްކޯއިން ބުނަނީ ކަރަންޓު ކޭބަލްގެ މައްސަލައެއް ޖެހުނު ކަމަށް. ރަނގަޅުވާނެ ދުވަހެއް ވެސް ނުބުނޭ،" މަލީހު ވިދާޅުވި އެވެ.

މިފަހަރު ވެސް ކަރަންޓު ނުދިން ކަމުގައި ވިޔަސް އާޓިފިޝަލް ބީޗުގައި ޖަލްސާ ބާއްވާނެ ކަމުގެ ޔަގީންކަން މަލީހު ވަނީ ދީފަ އެވެ.