ތ. ކަނޑޫދޫ/ ގުޑްލަކް އަލީ ނާސިހުގެ ހިތްދަތި އެތައް ވާހަކަތަކެކެވެ. ބަލާލަށް ހިތަށް ނުކުޅަދާނަ ހާލަތެވެ. ޒިންމާ ވާންޖެހޭ ފަރާތަކީ ކޮބައިހެއްޔެވެ؟ ހުން އައިސްގެން ކަނޑޫދޫގެ ސިއްހީ މަރުކަޒަށް ދައްކަން ދިޔަ މީހާއަށް ކުރިމަތިވީ މަރުގެ އެތިފަހަރެކެވެ. ފަރުވާ ކުޑަކޮށްލެވުނީ ކޮންބަޔަކަށް ހެއްޔެވެ؟

މިއަދު  ނާސިހު އޮތީ އައިޖީއެމްއެޗުގައި އެނދުމަތިކުރެވިފައެވެ. "ކުރިއަށް" މީޑިއާއިން ފުރަތަމަ ނާސިހުއާ ވާހަކަދައްކާލަން މަސައްކަތްކުރުމުންވެސް ދޫކޮށްލީ ވަރަށް ފުން ނޭވާއެކެވެ. ނާސިހުއަށް މިއަދު ޖެހިފައިވި ހާލަތުގެ ޒިންމާ އުފުލަން ޖެހޭނީ ކޮން ފަރާތަކުންތޯ ސުވާލުކުރުމުން  ނާސިހު ވަނީ ކަނޑޫދޫ ސިއްހީ މަރުކަޒުގައި މަސައްކަތްކުރާ ބިދޭސީ ޑޮކްޓަރުގެ އިހުމާލުގެ ވާހަކަ ތަފްސީލްކޮށްދީފައެވެ. ނާސިހު ވަނީ އޭނާއާ މެދު ކަންތައްތައް ވެގެން ދިޔަގޮތް ވަރަށް ތަފްސީލުކޮށް ނާސިހު  "ކުރިއަށް" މީޑިއާއަށް ހިއްސާކޮށްފައެވެ.                  

ކަނޑޫދޫ ކައުންސިލްގެ ކުރީގެ ރައީސްކަންވެސް ކުރި ނާސިހު އެ ރަށު ސިއްހީ މަރުކަޒަށް ދިޔައީ މިދިޔަ މަހުގެ 16 ވަނަ ދުވަހުގެ ރެއެވެ. ގަދަ ހުމެއް އަންނާތީ ހުންގަނޑު މައިތިރި ނުވުމުގެ ސަބަބުންނެވެ. ކަނޑޫދޫ ސިއްހީ މަރުކަޒަށް ގޮސް މާ އިރުތަކެއްނުވެ، އެ ރޭގެ 1:30 ހާކަށްއިރު އެ ރަށުގެ ސިއްހީ މަރުކަޒުން ނާސިހު ގެއަށް ދޫކޮށްލިއެވެ. ކަންވީގޮތެއް ނޭނގުނެވެ. އޭގެ އަނެއްދުވަހު ޓެސްތުތައް ހަދަން ބުނެފައި ގެއަށް ދޫކޮށްލުމުން ނާސިހުގެ އަންހެނުންނާއި އާއިލާވެސް ދިމާވާން އުޅެނީ ކިހާ ބޮޑުކަމެއްކަމެއް ރޭކާނުލައެވެ.     

 

ނާސިހު

ޖެހިގެން އައިދުވަހު ނާސިހު އަނެއްކާވެސް ސިއްހީ މަރުކަޒަށް ދިޔައެވެ. ގޮސް ޓެސްޓްތަކެއް ހެދުމަށް ގައިން ލޭ ނެގިއެވެ. ކަންވީގޮތެއް ތަފްސީލުކޮށްނުދީ ކަނޑޫދޫ ސިއްހީ މަރުކަޒުން ނާސިހު އަނެއްކާވެސް ގެއަށް ދޫކޮށްލިއެވެ. އޭގެ އަނެއް ދުވަހު އަނެއްކާވެސް ސިއްހީ މަރުކަޒަށް ދިއުމުން ޑޮކްޓަރު މި ފަހަރު ނާސިހުއަށް ކުރީ ސުވާލެކެވެ. އެޑްމިޓްވާން ބޭނުންވަނީ ގޭގަތޯ ނޫނީ ސިއްހީ މަރުކަޒުގައިތޯއެވެ. ސިއްހީ މަރުކަޒުގައި އެޑްމިޓްވުމަކީ އެންމެ ރަނގަޅުގޮތްކަމަށް ނާސިހަށާއި އޭނާގެ އަންހެނުންނާއި އާއިލާގެ އެންމެންނަށްވެސް ފެނުމުން ނާސިހު އެޑްމިޓްވީ އެ ރަށުގެ ސިއްހީ މަރުކަޒުގައެވެ. އޭގެ ފަހުގައިވެސް ނާސިހުގެ ހުމަކަށް ބަދަލެއް ނާދެއެވެ. ހަމަ އެހާ ވޭނުގައި ނާސިހު ދިޔައީ ކަނޑޫދޫގެ ސިއްހީ މަރުކަޒުގައި ވަގުތު ހޭދަކުރަމުންނެވެ. 

ފުއްޕާމެއަށް އޮކްސިޖަން ދަށްވާހެން ހީވެ ވަރުބަލިވާހެން ހީވުމުން ދެން ނާސިހު ކުރީ އާދެހެކެވެ. އެއަކަށް ކަނޑޫދޫ ސިއްހީ މަރުކަޒުން ނާސިހުއާ ހަވާލުވެ ހުރި ޑަކުޓަރަށް އަމަލެއް ނުކުރެވުނެވެ. ނާސިހުގެ ވޭންތަކަށް ކެތްކުރަން އުނދަގޫވުމުން ނާސިހު ޑަކްޓަރުކައިރީގައި އާދޭސްކުރަން ފެށިއެވެ.         

މިދިޔަ މަހުގެ 21 ވަނަ ދުވަހުގެ ރެއާއި ހިސާބަށް ނާސިހު އޮތީ އެހާލެއްގައެވެ. ހަދާނެގޮތް ހުސްވެފައެވެ. އެ ދުވަހު ރެއަށް އަޅައިލުމުން ކަނޑޫދޫ ސިއްހީ މަރުކަޒުން އޮކްސިޖަން ގުޅައިދިނެވެ. އެކަމު އެގޮތަށް ކަންތައް ވެގެންދިޔައީ ސިއްހީ މަރުކަޒާއި ހަވާލުވެ ހުންނެވި މެނޭޖަރު ޝިފްނާގެ ހިތްވަރާއި މަސައްކަތުގެ ސަބަބުންކަމަށް ނާސިހު ކިޔައިދިނެވެ. ނާސިހު ކިޔައިދިންގޮތުން އޮކްސިޖަން ގުޅައިދިނީ މެނޭޖަރު ޑަކްޓަރަށް ޕްރެޝާކުރި ވަރުންނެވެ. ނާސިހުވަނީ މެނޭޖަރުގެ މި އަމަލަށް މެނޭޖަރަށް ހާސްފަށުން ޝުކުރު އަދާކޮށްފައެވެ. ނާސިހު ގަބޫލުކުރާ ގޮތުގައި މެނޭޖަރު އެގޮތައް ކަންތައް ނުކުރިނަމަ ނާސިހު ދުނިޔޭގައި ނެތީހެވެ.  

ޑަކްޓަރު އޭރުވެސް އޮކްސިޖަން ގުޅާކަށް އެއްބަހެއް ނުވިކަމަށް ނާސިހު ކިޔައިދިނެވެ. އެ އަތޮޅު ވޭމަންޑޫކޮޅުގައި ހުންނަ ފިޒިޝިއަނާއި ވާހަކަދައްކައިގެން އެކޮޅުން ގެންނަ ބޭހަކުން ނާސިހު ރަނގަޅުވާނެކަމަށް ޑަކްޓަރު ބުނަމުން ގެންދިޔަކަމަށް ނާސިހު ކިޔައިދިނެވެ. 

ނާސިހުގެ ހާލަތު ގޯސްވެ 21 ވަނަ ދުވަހު ނާސިހު ވޭމަންޑޫގައި ހުންނަ އަތޮޅު ހޮސްޕިޓަލަށް  އޭނާ ބަދަލުކުރެވުނެވެ. އެ ހޮސްޕިޓަލިގެ ޑޮކްޓަރުންވެސް ފުރަތަަމަ ބޭނުންވީ އޮބްޒަވޭޝަންގައި އެއް ދުވަހު އޭނާ ބޭއްވުމަށެވެ. ނަމަވެސް އެކަމާ ދެކޮޅުވެ، އޮކްސިޖަން ދަށަށް ދިއުމުން ލޯންޗެއްގައި ގަދަ ކަނޑުގައި ދަތުރުކޮށް މާލެ ގެނެސް އައިޖީއެމްޗުގައި ފަރުވާދޭން ފެށިއެވެ. ނާސިހުގެ ހާލަތަށް ބަދަލެއް ނާންނާތީ ވެންޓިލޭޓަރަށް ލެވުނެވެ. ނާސިހުއަށް ވެގެން އުޅެނީ ކިހާ ބޮޑުކަމެއްކަން އެނގިގެންދީ ދެނެވެ. އަވަސް ފަރުވާ ދޭންފެށިއެވެ. ޓެސްޓްތައް ހަދަން ފެށިއެވެ. ޓެސްޓްތައް ހިފައިގެން އައިސް ތަފްސީލުކޮށް ނާސިހުއަށް ވެފައިވާގޮތް ކިޔައިދިނެވެ. ނާސިހުއަށް އޭރު ވަނީ އިންފްލުއެންޒާ ޖެހިފައެވެ. އެއަށް ފަރުވާ ނުކުރުމުގެ ސަބަބުން ނާސިހުގެ ބަލި ވަނީ ނިއުމޯނިއާއަށް ބަދަލުވެފައެވެ.އެއިރު އޮކްސިޖަން ދަށްވަމުން ގޮސް 50 ލީޓަރުންވެސް އޭނާގެ އޮކްސިޖަން ނުހިފަހައްޓައެވެ.        

ގަދަކޮށް ހުރި ނާސިހުގެ މުޅި ހަށިގަނޑަށް ހޮޅިތައް ގުޅިއެވެ. ގޮތްހުސްވިޔަސް އެ ނޫން ގޮތެއް އޭނާއަކަށް ނެތެވެ. އަންހެނުންނާއި ދަރިންނާއި، އާއިލާއަށް މިތަން ބަލާކަށް ކުޅަދާނަ ނުވިޔަސް ކުރާނީ ކީއްހެއްޔެވެ؟ ބަލި ހާލުގައި އޮވެވެސް ނާސިހު މިވާހަތައް "ކުރިއަށް" ޓީމާއި ހިއްސާކުރަމުންދިޔައިރު ނާސިހުއަކީ ކިހާ ކެތްތެރި މީހެއްކަން އެނގިގެންދިޔައެވެ.  ވެންޓިލޭޓަރުގައި އޭނާ ހޭދަކުރި ދުވަސްތަކަކީ ބިރުވެރި ދުވަސްތަކެކެވެ. ދެބަ ދޭތެރޭގައި މަންޒަރުތައް ފެނުނު ނަމަވެސް މީހާ އޮތީ ބަންޑުން ބާއްވައި ފަހަތަށް ދެ އަތް ބަނދެފައެވެ. ވަށައިގެން ހުސް ބަލި މީހުންނެވެ. އާއިލާގެ މީހުންނަށާއި ރަށްޓެހިންނަށް ވަދެވެނީ ދުވާލަކު އެންމެ ގަޑިއިރަކުއެވެ. އެ ވޭނުގައިވެސް އޭނާ ކެތްކޮށްފިއެވެ.  

މިހާރު ނާސިހު އޮތީ ވެންޓިލޭޓަރުގައި ހަ ދުވަހު ހޭދަކުރުމަށްފަހު، ވޯޑުގައެވެ. އިރާދަކުރެއްވީތީ އޭނާގެ ހާލަތު މިހާރު ވަރަށް ރަނގަޅެވެ. ނަމަވެސް އަދިވެސް ހަށިގަނޑުގެ އެއްފަޅި ވަނީ އައްސިވެފައެވެ. ހަރަކާތްކުރަން އުނދަގުލެވެ. ނާސިހު އެދެނީ އޭނާއަށް ދިމާވިފަދަ ހާލަތެއް ކަނޑޫދޫގެ އެހެން ރައްޔިތަކަށް ދިމާވުމުގެ ކުރިން ކަންކަމަށް އެދެވޭ ހައްލެއް ލިބި ގާބިލް މީހުން ސިއްހީ ފަރުވާ ދިނުމަށް ލުމެވެ.