މި މަހުގެ 4 ވަނަ ދުވަހު ރ. ކިނޮޅަހާ ދިމާލުން ފެނުނީ ފިރިހެނެއްގެ ހަށިގަނޑު ކަމަށް ފުލުހުން މިއަދު ބުނެފި އެވެ. 

ފުލުހުން މީގެ ކުރިން ބުނެފައިވާ ގޮތުން ހަށިގަނޑު ވަރަށް ބޮޑަށް ކުނިވެ ހަލާކުވެފައި އޮތުމުގެ ސަބަބުން އެ މީހާގެ ޖިންސް މިހާތަނަށް ދެނެގަނެވިފައިނުވެ އެވެ.

މައްސަލައިގެ އަޕްޑޭޓް ހިއްސާކުރަމުން ފުލުހުން ބުނީ، ކިނޮޅަހު ބޭރުން މި މަހުގެ 4 ވަނަ ދުވަހު ފެނުނު ހަށިގަނޑުގެ ޑީއެންއޭ ތަހުލީލުތައް ހަދާފައިވާ ކަމަށެވެ. 

އެއީ ފިރިހެނެއްގެ ހަށިގަނޑުކަން ކަށަވަރުވެފައިވާ ކަމަށް ފުލުހުން ބުންޏެވެ. ނަމަވެސް އެ މީހާއާ ގުޅޭ އިތުރު މައުލޫމާތެއް ފުލުހުން ހިއްސާއެއް ނުކުރެ އެވެ. 

ކިނޮޅަހު ބޭރުން ފެނުނު ހަށިގަނޑާއި ކ. ކަނޑޫމާތިލަ ކައިރިން މިދިޔަ ޑިސެމްބަރު 21 ވަނަ ދުވަހު ފެނުނު ހަށިގަނޑުގެ ޑީއެންއޭގެ ނަތީޖާއަށް ބަލާއިރު، އެއީޑިސެމްބަރު 17 ވަނަ ދުވަހުން ފެށިގެން ގެއްލިގެން ހޯދަމުންދާ ރަޝިއާގެ ފަތުރުވެރިޔާގެ ހަށިގަނޑު ނޫންކަން ވެސް ޔަގީންކުރެވިފައިވާ ކަމަށް ފުލުހުން ބުންޏެވެ.

މި މައްސަލައާ ގުޅިގެން އިތުރަށް ބަލަންޖެހޭ ކަންކަން ފުލުހުން ދަނީ ބަލަމުންނެވެ.