ހަށިގަނޑު ވަރަށް ބޮޑަށް ކުނިވެ ހަލާކުވެފައި އޮތުމުން، ރ. ކިނޮޅަހާ ދިމާ ބޭރު ކަނޑުމަތިން މަރުވެފައި އޮއްވާ ފެނުނު މީހާގެ ޖިންސު ކަށަވަރުނުވާ ކަމަށް ފުލުހުން މިއަދު ބުނެފި އެވެ.

އިއްޔެ ހަވީރު 4:24 ހާއިރު ކިނޮޅަހާ ދިމާލުން މީހެއްގެ ހަށިގަނޑު އޮޔާދާކަމުގެ މައުލޫމާތު ލިބުމާ ގުޅިގެން ފުލުހުން ވަނީ ހަރަކާތްތެރިވެފަ އެވެ.

މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ، ހަށިގަނޑު ވަރަށް ބޮޑަށް ކުނިވެ ހަލާކުވެފައި އޮތުމުގެ ސަބަބުން ޖިންސް މިހާތަނަށް ދެނެގަނެވިފައިނުވާ ކަމަށެވެ.

ފުލުހުން ބުނީ މިހާރު ކުރަމުން އަންނަނީ ތަހުގީގަށް ބޭނުންވާ ފޮރެންސިކް ސާމްޕަލް ނެގުމާއި، ތަހުގީގުގެ ތެރެއިން ފުރިހަމަކުރަންޖެހޭ އިޖުރާއަތްތައް ފުރިހަމަ ކުރުމުގެ މަސައްކަތް ކަމަށެވެ.

މަރުވެ ކުނިވެފައި އޮއްވާ ފެނުނު މީހާއާ ގުޅޭ އިތުރު މައުލޫމާތެއް ނޭނގެ އެވެ.