ކުރިއާ ހިލާފަށް، ކީރިތި ޤުރްއާން ހިތުދަސްކުރާ ހާފިޒުން ދަސްވެނިވުމުގެ ރަސްމިއްޔާތުގައި ސަނަދު ހަވާލުކުރެވޭ މީހުން އިތުރުވަމުން އައި ނަމަވެސް ދިވެހީންގެ ސްޓެންޑާޑް ނުވަތަ ފެންވަރު މިއަށް ވުރެ ވެސް އަދި މަތިވާން ވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

މިރޭގެ ރަސްމިއްޔާތުގައި 24 މީހަކަށް ހާފިޒުކަމުގެ ސަނަދު ރައީސްގެ އަތްޕުޅުން ހަވާލުކޮށްދެއްވި އެވެ. އޭގެ ތެރެއިން 23 ހާފިޒުންނަކީ އުމުރުން 18 އަހަރަށް ވުރެ ދަށް އުމުރުގެ ހާފިޒުންނެވެ.

ހާފިޒުންގެ ދަސްވެނިވުމުގެ ރަސްމިއްޔާތު ޝަރަފުކޮށްދެއްވައި ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނުގެ ޅައިރުގައި އެހާ ގިނަ ހާފިޒުން ނެތް ކަމަށެވެ. ހާފިޒުން ގިނަވަމުން އައީ، ހާއްސަކޮށް ކުރީގެ ރައީސް މައުމޫން އަބްދުއްގައްޔޫމަށް ފަހު ކޮންމެ ސަރުކާރެއްގައި ވެސް އެ ކަމަށް އިސްކަން ދިނުމުގެ ސަބަބުން ކަމަށް އެމަނިކުފާނު ވިދާޅުވި އެވެ.

"އަޅުގަނޑުގެ ކުޑައިރުގެ ހާލަތު. އަޅުގަނޑުގެ ކާފައާއެކު އޭރު ދާ މިސްކިތް. އެ މިސްކިތް މިހާރު ނުވެސް ނެތް. މަސްޖިދުލް ސަލާމަށް ދާއިރުގައި މުދިމަކަށް ހުންނާނެ މީހެއް. މުގުރި ކިޔާނީ. އޭރުގައި ހާފިޒުންނަށް ކިޔާ ނަން އެއީ. އަސްލު ނަމެއް ވެސް ނޭނގެ. އަޅގަޑުމެން އޭރު ދަންނަ މުގުރިއަކީ އެއީ،" ރައީސް ވިދާޅުވި އެވެ.

މިއަދު ހާފިޒުން ގިނަ ނަަމަވެސް ސައްތައިން ސައްތަ މުސްލިމު ގައުމެއްގައި އަހަރެއް ތެރޭގައި ތަމްރީނުވާން ޖެހޭނީ 24 ހާފިޒުން ނޫން ކަމަށް ރައީސް ވިދާޅުވި އެވެ. މި ސަރުކާރުގެ އަމާޒަކީ އަހަރަކު 100 ހާފިޒުން ތަމްރީން ކުރެވޭ ވަރަށް ޕްރޮގްރާމްތައް ހިންގުމެވެ. އަދި މި ސަރުކާރުގެ ފަސް އަހަރު ދުވަހުގެ ތެރޭގައި ޖުމުލަ 1000 ޒުވާން ހަތީބުން ތަމްރީނުކުރުމެވެ.

ރައީސް ވިދާޅުވީ އެމަނިކުފާނުގެ ފަލްސަފާއަކީ ހަގީގީ ތަރައްގީއަކީ އާހިރަތަށް ޓަކައި މި ދުނިޔޭގައި ކުރެވޭ މަސައްކަތެވެ. ފިކުރީ ތަރައްގީ އެވެ. އުމްރާނީ ތަރައްގީއަށް ކުރެވޭ މަސައްކަތްތަކުގެ ބޭނުން ހިފޭނީ ވެސް ފިކުރީ ތަރައްގީ ވެސް ހިމެނިގެން ކަމަށް ރައީސް ދައްކަވާ ވާހަކަ މިރޭ ވެސް ތަކުރާރުކުރެއްވި އެވެ.

ރައީސް ވަނީ ހިޔާލު ފާޅުކުރުމުގެ މިނިވަން ކަމުގެ ތެރެއިން، އިންސާނީ ކަރާމާތް ނަގާ ނުލައި އެކަކު އަނެކަކަށް އިހުތިރާމު ކުރުމަށް ނަސޭހަތް ދެއްވައިފަ އެވެ. ރައީސްގެ އިލްތިމާސަކީ ކީރިތި ޤުރުއާނަކީ ހަމައެކަނި ރަސްމިއްޔާތުތަކުގައި ކިޔަވާ ފޮތަކަށް ވުރެ، ދިރިއުޅުން ބިނާކުރަންވީ ގޮތުގެ ގައިޑްލައިންގެ ގޮތުގައި އޮތުމެވެ.