ހެޔޮ ވެރިކަމުގެ އަސާސަކީ އިސްލާމް ދީނެވެ. ޑިމޮކްރެސީ ވެސް މި ދަންނަ ރައްޔިތުންނާއި އުންމަތަށް ވެރިކަން ކުރުމުގެ އަސާސަކީ ހަގީގަތުގައި އިސްލާމީ ވެރިކަންތަކުން ފެނިފައިވާ ހަމަތަކެކެވެ.

ރައީސް މުހައްމަދު މުއިއްޒުގެ ބައްޕާފުޅު ޝެއިހު އަބްދުއްރަހުމާން ލިޔުއްވާފައިވާ ފޮތުގެ މައިގަނޑު މައުލޫއަކީ "ވެރިކަމުގެ ބާރުގެ އަސާސަކީ އުންމަތް" ކަމެވެ. އެއީ ރައީސްގެ ސިޔާސީ ފިކުރުގެ ތަނބެވެ.

އެމަނިކުފާނަކީ ވަތަނީ ފިކުރުގެ ލީޑަރެކެވެ. މި ވަތަނުގެ އަގީދާއާއި އިސްލާމީ އުސޫލުތައް ހިމާޔަތް ކުރަން ޖެހޭނެ ކަމަށް ގަބޫލުކުރަައްވާ ލީޑަރެކެވެ. ސަގާފަތާއި އާދަކާދަތައް ދަމަަހައްޓައި އަމިއްލަވަންތަކާއި މިިނިވަންކަން ރައްކާތެރިކުރަން ޖެހޭނެ ކަމަށް ވަކާލާތުކުރައްވާ ލީޑަރެކެވެ.

ރާއްޖޭގެ ސިޔާސީ މަސްރަހުގައި ދެ ސިޔާސީ ފިކުރެއް ކުރިއަރައި ގޮސްފައިވާއިރު ރައީސް މުއިއްޒު އަބަދުވެސް ހުންނެވީ ވަތަނީ ފިކުރުގެ ޖަމާއަތާ އެކީ އެވެ. ސައްތައިން ސައްތަ އިސްލާމީ ގައުމެއްގެ ގޮތުގައި ރާއްޖެ އޮންނަން ރައީސް ބޭނުންފުޅުވާ މިންވަރު، ރައީސްގެ ރިޔާސީ ދައުރުގެ ދެވަނަ ރިޔާސީ ބަޔާނުން ހާމަވެގެން ދިޔަ އެވެ.

އެމަނިކުފާނު ގަބޫލުކުރައްވާ ފަލްސަފާއާއި މަންހަޖަކީ އަދިވެސް ކުރިން ގެންގުޅުއްވި މަންހަޖެވެ. ރިޔާސީ ބަޔާން ފެއްޓެވީ އެ ވާހަކައިންނެވެ.

"އަޅުގަނޑުގެ މަންހަޖަކީ، ކުރީ އަހަރުގެ ވެސް މަންހަޖުއެއީ ދިވެހި އުންމަތުގެ ހާލާއި، މުސްތަޤުބަލު ކަނޑައެޅުމުގައި އެންމެ މުހިންމު އަސާސްތަކަކީ، މާތްވެގެންވާ އިސްލާމް ދީނާއި، ދިވެހީންގެ އަމިއްލަވަންތަ ކަމާއި، ދިވެހީންގެ މިނިވަންކަމާއި ސިޔާދަތު ރައްކާތެރިކުރުންކަން ކަށަވަރުކުރުން. އަޅުގަނޑުގެ މަންހަޖަކީ، ކުރީ އަހަރުގެ ވެސް މަންހަޖު،" ރައީސް ވިދާޅުވި އެވެ.

ރައީސް ޑރ. މުހައްމަދު މުއިއްޒުގެ ދެވަނަ ރިޔާސީ ބަޔާން އިއްވެވި ޖަލްސާގެ ތެރެއިން - ފޮޓޯ: މަޖިލީސް

އިސްލާމީ ރިވެތި އުސޫލުތަކުގެ ހަމަތައް ފެތުރުމަށް އެފަދަ ޕްރޮގްރާމެއް ފައްޓަވާނެ ކަން އެމަނިކުފާނު އިއުލާންކުރެއްވި އެވެ.

"ލީޑާޝިޕް ކޮލިޓީ އެންމެ ރަނގަޅަށް ހުންނަން ވާނީ މުސްލިމުންގެ ކިބައިގައި. ވީމާ، އިސްލާމީ ލީޑާޝިޕް ކޮލިޓީ އުގަންނައިދީ ހޭލުންތެރި ކުރުވުމަށް ޓަކައި އިސްލާމީ ލީޑާޝިޕް މެނޭޖްމަންޓް ޕްރޮގްރާމެއް އެ ކަމާ ގުޅުން ހުރި ދާއިރާތަކާއި ޖަމިއްޔާތަކަށް އަމާޒުކޮށްގެން، މި އަހަރު ކުރިއަށް ގެންދާ ގޮތަށް ވާނީ ހަމަޖައްސާފައި،" ރައީސް މުއިއްޒު ވިދާޅުވި އެވެ.

ލީޑާޝިޕްގެ އެންމެ މަތީ ކޮލިޓީ ހުންނެވި ކަމަށް ދުނިޔެ ދުށް ލީޑަރަކީ ކީރިތި ރަސޫލާ މުހައްމަދު ސައްލަﷲ އަލައިހި ވައްސަލަމް ކަން ވެސް ވަރަށް ފަހުރުވެރިކަމާއެކީ ރައީސްގެ ވާހަކަފުޅުގައި ފާހަގަކުރެއްވި އެވެ.

"ޝައްކެއް ވެސް ނެތް ގޮތުގައި ދުނިޔެ ދުށް އެންމެ މަތިވެރި ލީޑަރަކީ އަޅުގަނޑުމެންގެ ލޮބުވެތި ނަބިއްޔާ މުހައްމަދު ސައްލަﷲ ޢަލައިހި ވަ ސައްލަމް. މިއީ އިލާހީ އެންގެވުމުގެ އިތުރަށް، މުސްލިމުންނާއި ގައިރު މުސްލިމުން ވެސް އެ މައްޗަށް އެތައް އިޢުތިރާފެއްވެ، އެތައް ފޮތެއް ލިޔެ އެ މައުލޫއުގައި ޝާއިޢުކުރެވިފައިވާ ސާފު ހަގީގަތެއް،" ރައީސް ވިދާޅުވި އެވެ.

ރައީސްގެ ވާހަކަފުޅުގައި އިތުރަށް ފާޙަގަކުރެއްވީ އެމަނިކުފާނުގެ ރިޔާސީ ދައުރުގެ ފުރަތަމަ އަހަރު ކުރެއްވި މަސައްކަތްތަކެކެވެ.

• މުޅި ރާއްޖެއަށް އަމާޒުކޮށްގެން ރިސާލަތު ޕްރޮގްރާމްގެ ނަމުގައި ހާއްސަ ޕްރޮގްރާމެއް ފަރުމާކޮށް، މި ދިޔަ އަހަރުވާނީ ރާއްޖޭގެ އެކި ކަންކޮޅުތަކުގައި  އެ ޕްރޮގްރާމު ހިންގިފައި.
• ދިވެހި މުޖުތަމަޢު ފަރުޟު ފަސް ނަމާދަށް އަހުލުވެރި ކުރުވުމުގެ މާތް މަގުސަދުގައި "ނަމާދު މަތިވެރިކުރުން" މި ނަމުގައި ވެސް މުހިންމު މަޝްރޫއެއް ވާނީ ފަށައިފައި.

މި މަސައްކަތްތައް މި އަހަރު ވެސް ކުރިއަށް ގެންދާނެ ކަމުގެ ޔަގީން ކަން ރައީސް ދެއްވި އެވެ.