ތަރައްގީއާ ގުޅުންހުރި 9 ދާއިރާތަކުން މަޝްރޫއުތައް ހިންގުމަށް 206 އެއްބަސްވުމެއްގައި އަމިއްލަ ކުންފުނިތަކާ އެކު ސަރުކާރުން މިއަދު ސޮއިކޮށް، ރެކޯޑެއް ގާއިމްކޮށްފި އެވެ.

ބާސެލޯ ނަސަންދުރާގައި މިއަދު ބޭއްވި ރަސްމިއްޔާތެއްގައި 53 އަމިއްލަ ކުންފުންޏަކާ އެކު ވަނީ މަޝްރޫއުތައް ކުރިއަށް ގެންދިއުމަށް އެއްބަސްވެފައިވެ އެވެ.

ކޮންޓްރެކްޓާ ފައިނޭންސް އުސޫލުން ހިންގުމަށް މިއަދު ހަވާލުކޮށްފައިވަނީ:

• ކުޅިވަރާ ގުޅުންހުރި 52 މަޝްރޫއު
• ހޯމްލޭންޑް ސެކިއުރިޓީގެ ދާއިރާގެ 39 މަޝްރޫއު
• ތައުލީމީ ދާއިރާގެ 31 މަޝްރޫއު
• ސިއްހީ ދާއިރާގެ 30 މަޝްރޫއު
• ތިމާވެށީގެ ދާއިރާގެ 24 މަޝްރޫއު
• ބޯހިޔާވަހިކަމާއި އިންފްރާސްޓްރަކްޗާގެ 13 މަޝްރޫއު
• ދީނީ ކަންކަމާ ގުޅުންހުރި 14 މަޝްރޫއު
• މަސްވެރިކަމުގެ ދާއިރާގެ 2 މަޝްރޫއު
• ޒުވާނުންނާ ގުޅޭ 1 މަޝްރޫއު

އެ ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ މިއަދު ސޮއިކުރެވުނު މަޝްރޫއުތަކުގެ ނަތީޖާއަކަށް ވާނީ، ރާއްޖޭގެ އިގްތިސާދު ފުޅާވެގެންދިޔުން ކަމަށެވެ. އަދި އިގްތިސާދަށް ދިރުން އައުން ކަމަށާއި، ކޮންސްޓްރަކްޝަން އިންޑަސްޓްރީ ހާއްސަގޮތެއްގައި، ކުރިއަރައިގެން ދިޔުން ކަމަށެވެ.

ސޮއިކުރެވުނު މަޝްރޫއުތަކަކ އެއްވެސް ކަހަލަ ޕޭމެންޓެއްގެ ނުވަތަ ފައިސާ ލިބުމުގެ އެއްވެސް ތާށިކަމެއް ނާންނާނެ މަޝްރޫއުތަކެއް ކަމަށް ރައީސް ވިދާޅުވި އެވެ.

''މަސައްކަތްތައް ބަރާބަރަށް، އެގްރީމަންޓްގައި ވާގޮތަށް ކުންފުނިތަކުން ކުރަމުން ގެންދާނެ. ކުރުމަށް މަޖުބޫރުވާނެ. އެކަމުގައި ޕޭމެންޓަށް ހުށަހެޅުމުން ބަރާބަރަށް ފައިސާ ލިބޭ، ވަރަށް ހަލުވި ދުވެލީގައި، ވަރަށް އެފިޝަންޓްކޮށް ގެންގޮސް ނިންމާލެވޭނެ މަޝްރޫޢުތަކެއްގައި ސޮއިކުރެވިގެން މި ދިޔައީ'' ރައީސް ވިދާޅުވި އެވެ.

ރައީސް ވިދާޅުވީ މަސައްކަތްތައް އެގްރީމަންޓް ކުރެވިފައިވާ ގޮތަށް، ދާދި އަވަހަށް ހުރިހާ ކުންފުނިތަކުން މަސައްކަތް ފަށްޓާނެ ކަމަށެވެ.