ރައީސް ޑރ. މުހައްމަދު މުއިއްޒުގެ ހަގު ދަރިކަލުން އުމައިރު މުހައްމަދު މުއިއްޒަށް ދޮގު ތުހުމަތުތައް ކުރި ކަމަށް ބުނާ މައްސަލާގައި އިދިކޮޅު އެމްޑީޕީއާ ދެކޮޅަށް މަދަނީ ދައުވާ ކުރާނެ ކަމަށް ރައީސްގެ އަނބިކަނބަލުން އަދި އުމައިރުގެ މަންމާފުޅު ސާޖިދާ މުހައްމަދު ވިދާޅުވެއްޖެ އެވެ.

ރައީސްގެ އާއިލާގެ ވަކީލުން ކުރިއަށް ގެންދާ ނޫސްވެރިންގެ ބައްދަލުވުމުގައި ސާޖިދާގެ ބަޔާނެއް އިއްވި އެވެ. ބަޔާން އިއްވެވީ ރައީސްގެ ވަކީލު އަދި ކުރީގެ ބަންޑާރަ ނައިބު އައިޝަތު އާޒިމާ ޝަކޫރެވެ. ދައުވާ އުފުލާ ވާހަކަ އޮތީ އާޒިމާ އިއްވެވި ސާޖިދާގެ ބަޔާނުގަ އެވެ.

ބަޔާނުގައި ސާޖިދާ ވިދާޅުވީ އެމްޑީޕީގެ އިތުރުން ދަރިކަލުންނަށް ދޮގު ތުހުމަތުތައް އެޅުއްވި، މަޖިލީހުގެ ގަލޮޅު އުތުރު ދާއިރާގެ މެންބަރު މީކާއީލް އަހުމަދު ނަސީމްގެ މަންމާފުޅު މަރިޔަމް ޒުބައިރު (މަންދީ) އަދި މަންދީގެ ވާހަކަތައް ދިފާއުކުރެއްވި އެމްޑީޕީގެ ޗެއާޕާސަން ފައްޔާޒު އިސްމާއީލްގެ މައްޗަށް ވެސް މަދަނީ ދައުވާ ކުރާނެ ކަމަށެވެ.

ދަރިކަލުން އުމައިރަކީ ދުވަހަކު ވެސް ވޭޕް އަދި އެ ނޫން ބާވަތްތަކުން ވެސް ދުންފަތުގެ އިސްތިއުމާލު ކުރައްވާ ކުއްޖެއް ނޫން ކަމަށް ވެސް ސާޖިދާގެ ބަޔާނުގައިވެ އެވެ.

ސިޔާސީ ބަހުސެއްގެ ތެރެއަށް ދަރިކަލުން ވެއްދުމުން ސަރުކާރުގެ ކޮންމެ އިސް ބޭފުޅަކު އިއްޔެ ސޯޝަލް މީޑިއާގައި އެ ކަން ކުށްވެރިކުރެއްވި އެވެ. ބައެއް ދީނީ އިލްމުވެރިންނާއި، އާންމުންގެ ގިނަ ބަޔަކު ވެސް މަންދީގެ ވާހަކަތަކަށް ފާޑުކިޔާފައިވެ އެވެ.