ސިޔާސީ މަސައްކަތުގައި ފާޑުކިޔާނީ ސިޔާސީ ކަންކަމަށެވެ. ސިޔާސަތުތަކަށެވެ. ސިޔާސަތެއް ތަންފީޒުކުރާ ގޮތަކަށެވެ. ނޫނިއްޔާ ބާރެއްގެ ބޭނުން ނަހަމަ ގޮތުގައި ހިފުމާއި ހިޔާނާތްތަކާއި ކަމެއް ރަނގަޅަށް ނުކުރެވޭ ކަމަށް ދެކޭނަމަ އެކަމަކާ އެވެ. އެކަމަކު ޒާތީ ވުމަކީ ސިޔާސީ ފާޑުކިޔުމެއް ނޫނެވެ. އެފަދަ ކަމެއް ބަލައެއް ނުގަނެވޭނެ އެވެ.

އަމުދުން ކުޑަކުއްޖަކު ސިޔާސީ ބަހުސެއް ތެރެއަށް ވައްދައިގެން ނުވާނެ އެވެ. އެކަމަކު އިދިކޮޅު އެމްޑީޕީގެ އެއްވުމެއްގައި ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމްގެ މަންމަ މަރިޔަމް ޒުބައިރު 'މަންދީ' އެ ވަނީ އެ ހުދޫދުން ބޭރުވެފައި ކަމަށް ބުނެ ގިނަ ބަޔަކު ސޯޝަލް މީޑިއާގައި ޝުއޫރު ފާޅުކުރަމުންނެވެ.

މަންދީ ކުރެއްވި ކަމަކީ ސަރުކާރުގެ ސިޔާސަތެއް ގުޅުވީ ރައީސް މުހައްމަދު މުއިއްޒުގެ 18 އަހަރު ވެސް ނުފުރޭ ދަރިކަލަކަށެވެ. އެއީ ވެސް މި މުޖުތަމައުގައި ދިރިއުޅޭ ކުއްޖެކެވެ. މިހެން ފަތުރާ ސާބިތު ނުހިފޭ ވާހަކަތައް އެ ކުއްޖާއަށް އިވޭނީ ސްކޫލް މާހައުލުންނެވެ. ނޫނީ އެހެން ތާކުންނެވެ. އަސަރު ވެސް ކޮށްފާނެ އެވެ. ކުޑަކުއްޖެއްގެ ކަރާމާތް ރައްކާކުރަން ގާނޫނީ އޮނިގަނޑު ހަދައިގެން އުޅެނީ މިހެންވެ އެވެ.

ސަލަފް ޖަމިއްޔާގެ ނައިބު ރައީސް އަހުމަދު ސަމީރު ވެސް ލިޔުއްވި އެވެ؛ ސިޔާސީ އެއްވުންތަކާއި ޕޯޑިއަމްތަކުގައި މީހުންގެ ޅަދަރީން ހަވަރަށް ނުދޭށެވެ. މަޔަކު ނުވަތަ ބަފަޔަކު ސިޔާސީ މަގާމަކަށް އިންތިހާބު ވުމީ ހައްގުން ކަމަކާ ނުލައި އެ މީހެއްގެ ޅަދަރީން ރޮލާ ކާންޖެހޭ ސަބަބެއް ނޫނެވެ.

"ހިޔާލު ފާޅުކުރުމުގެ މިނިވަންކަމުގެ ނަމުގައި ވިޔަސް ހައްގުން ކަމަކާ ނުލައި، އިސްލާމް ދީނުގައި މާތްالله ހުރުމަތްތެރި ކުރައްވާފަައިވާ މުސްލިމުންގެ އަބުރާއި ކަރާމަތަށް އަރައި ނުގަތުމަށް ނަސޭހަތްތެރިވަން،" ސަމީރު ލިޔުއްވި އެވެ.

ރައްޔިތުންގެ މަޖިލީހުގެ ޗީފް ބިއުރޯ އަދި މަޖިލީހުގެ ކުރީގެ މެންބަރު އަހުމަދު ނިހާން ވެސް ލިޔުއްވި އެވެ؛ ސިޔާސީ ބޭނުމެއް ހާސިލް ކުރަން ކުޑަކުދިން ސިޔާސީ ހަމަނުޖެހުންތަކުގެ ތެރެއަށް ވައްޓާލުމަކީ ވަރަށް ދަށުދަރަޖައިގެ އަމަލެކެވެ. 

މަޖިލީހުގެ މައިނޯރިޓީގެ ލީޑަރުކަމާއި މެޖޯރިޓީގެ ލީޑަރު ކަން ވެސް ކުރައްވާފައިވާ ނިހާން ވިދާޅުވި ގޮތުގައި އެމްޑީޕީ އިސް އެކްޓިވިސްޓު މަންދީ ޒުބައިރު އެހިންގީ ކުޑަކުއްޖެއްގެ ކަރާމަތް ނަގާލުމުގެ އަމަލެކެވެ. ކުޑަކުދީންގެ ހައްގުތައް ހިމާޔަތްކުރުމުގެ ގާނޫނާ ހިލާފު އަމަލެކެވެ.

"ސަރުކާރުގެ އަމަލުކުރާ ގޮތް ކަމުނުދާ ނަމަ އެ ސިޔާސަތުތަކަށް ފާޑުކިޔަންވީ، ނަމަވެސް އެއްވެސް ހަގީގަތެއް ނެތް ބުނުތާނު ވާހަކަ ހިޔާލުފާޅުކުރުމުގެ ހައްގުގެ ނަމުގައި ބޭނުންކޮށް އެއްވެސް ކުށެއް ނެތް މައުސޫމު ކުޑަކުއްޖެއްގެ ކަރާމަތަށް އަރައިގަތުމަކީ އެއްވެސް ނިސްބަތަކުން ބަލައިގަނެވޭނޭ ކަމެއް ނޫން،" ނިހާން ވިދާޅުވި އެވެ.

އިސްލާމިކް ޔުނިވާސިޓީގެ ވައިސް ޗާންސެލަރު ޑރ. އަލީ ޒާހިރު ބިން ސައީދު ގާސިމް ވެސް ފާޑުވިދާޅުވި އެވެ؛ އޭނާ ހިއްސާކުރެއްވީ ސިޔާސީ ބޭނުމުގައި އަންހެނަކަށް ކުޑަކުއްޖަކަށް ބެލުމެއްނެތި ހަގީގަތް އޮޅޭ ގޮތަށް މުސްލިމުންގެ ބޮލުގައި ދޮގު އިލްޒާމު އަޅުވަމުން ހިގާ މީހުން ކިޔަންވީ އާޔަތެކެވެ.

އިޖުތިމާއީ ވުޒާރާގެ އިތުރުން އިންސާނީ ހައްގުތަކުގެ ކޮމިޝަނުންނާއި ސިޔާސީ ޕާޓީތަކުގެ ބެލެނިވެރި ފަރާތް ކަމަށްވާ އިންތިހާބުތަކުގެ ކޮމިޝަނުން ވެސް މި ކަން ކުށްވެރިކޮށް ބަޔާން ނެރެފި އެވެ. 

ސަރުކާރުގެ ވަޒީރުން، ރައްޔިތުންގެ މަޖިލީހުގެ މެންބަރުން، ޒިންމާދާރު މަގާމުތައް ފުރުއްވާ ބޭފުޅުން، އަދި މި ނޫނަސް ކިތަންމެ އާންމު މީހަކާއި ދީނީ އިލްމުވެރިން ދަނީ މި އަމަލު ކުށްވެރިކޮށް ފާޑުކިޔަމުންނެވެ.

އެމްޑީޕީން މި ކަމަށް މާފަށް އެދެންވީމައި އެ ކަން ނުކޮށް ކުރި ކަމަކީ އެ ކަން ދިފާއު ކުރުމެވެ. މަންދީގެ ވާހަކަތައް އޮޅުވާލައިގެން މިނިވަން ކޮމިޝަންތައް ލައްވައި ބަޔާން ނެރެނީއޭ ކިޔައި އަނެއްކާ ވެސް ކަމުގެ ހަގީގަތް އޮޅުވައިލުމެވެ.