މޮރިޝަސްއިން ރާއްޖެއާ ސިޔާސީ ގުޅުންތައް ކަނޑާލި ނަމަވެސް އެ މައްސަލައިގައި ރާއްޖޭން ފަހަތަށް ޖެހޭކަށް ނުޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ޗާގޯސްގެ މިލްކުވެރިކަމާ ގުޅޭ ގޮތުން އުފެދިފައިވާ ދެބަސްވުންތަކާ ގުޅިގެން މޮރިޝަސްގެ ކެބިނެޓުގެ އިއްޔެ ބައްދަލުވުމުގައި ނިންމި ނިންމުންތަކުގެ ތެރޭގައި ޗާގޯސްގެ ޖަޒީރާގެ ރަށްތަކުގެ މައްޗަށް މޮރިޝަސްގެ ސިޔާދަތީ ބާރު އޮތް ކަމަށް ރާއްޖޭން ގަބޫލުކުރަން މިހާރު ދެކޮޅު ހަދައި އިނގިރޭސި ސަރުކާރާ އެކު އެކުލަވައިލަން މަސައްކަތްކުރާ އެއްބަސްވުމަށް ވެސް ރާއްޖޭން އިއުތިރާޒު ކުރާކަން ވަނީ ފާހަގަކޮށްފަ އެވެ. 

އެހެންވެ، ރާއްޖެއާ އޮތް ހުރިހާ ސިޔާސީ ގުޅުމެއް ވަގުތުން މެދުކަނޑާލުމަށް މޮރިޝަސްގެ ކެބިނެޓުން ނިންމާފައިވެ އެވެ. 

އެ މައްސަލާގައި ރޭ އެކްސްގައި ނަޝީދު ވިދާޅުވީ މޮރިޝަސްގެ އެ ނިންމުމާ މެދު ވަރަށް ކަންބޮޑުވާ ކަމަށެވެ. އަދި ދެ ގައުމުން މަޝްވަރާކޮށް ސުލްހަވެރި ހައްލެއް ގެނެވޭނެ ކަމަށް އުއްމީދު ކުރައްވާ ކަމަށެވެ.

އެ ފަތުރުވެރިކަމުގެ ދާއިރާގެ ބޭފުޅުން ތިއްބަވާ ވަޓްސްއެޕް ގުރޫޕެއްގައި ނަޝީދު ވިދާޅުވީ، މޮރިޝަސްއާ މަޝްވަރާތައް ބޭއްވި ނަމަވެސް ރާއްޖޭން ފަހަތަށް ޖެހެން ޖެހޭ ކަމަށް ގަބޫލުނުކުރައްވާ ކަމަށެވެ.

"މޮރިޝަސްއާ ވާހަކަ ދައްކަން ޖެހޭ، އެހެނަސް ރާއްޖެ ފަހަތަށް ޖެހޭކަށް ނުޖެހޭ" ނަޝީދު ވިދާޅުވި އެވެ.