މާލޭގެ އިމާރާތަކުން ވެއްޓި، ބޮޑެތި އަނިޔާތަކެއް ލިބުނު ހައްވާ ޔުމްނު ރަޝީދު (21) އަށް މެލޭޝިއާގައި ކުރަން ޖެހުނު އެންމެ ނުރައްކާތެރި އޮޕަރޭޝަން ކާމިޔާބުވެއްޖެ ކަމަށް އާއިލާއިން ރޭ ބުނެފި އެވެ.

ޔުމްނުގެ އާއިލާއިން މައުލޫމާތު ދެއްވި ގޮތުގައި މިއަދު މެންދުރު 3:00 އިން ފެށިގެން ކުރި މި އޮޕަރޭޝަނަކީ ކަނދުރާއާ ދިމާލުން މައިބަދައިގެ ސީ7 ކަށިގަނޑުގައި އުފެދިފައިވާ ރެނދު ރަނގަޅު ކުރުމަށް ކުރި އޮޕަރޭޝަނެކެވެ. "މިއީ ޔުމްނު ކުރަން ޖެހުނު އެންމެ މުހިންމު އަދި އެންމެ ނުރައްކާތެރި އޮޕަރޭޝަން،" އާއިލާއިން ވިދާޅުވި އެވެ.

އިތުރު ފަރުވާތަކަށް ޔުމްނު މެލޭޝިއާއަށް ގެންދިޔައީ މިދިޔަ ހޮނިހިރު ދުވަހުގެ ރޭ އެވެ. އާއިލާއިން ވިދާޅުވި ގޮތުގައި މި އޮޕަރޭޝަން ކާމިޔާބުވުމާ އެކު، އިތުރު ނުރައްކާތެރި އޮޕަރޭޝަނެއް ކުރަން ނުޖެހޭކަމަށެވެ.  އަދި ހުރިހާ ކަމެއް ރަނގަޅަށް ދިމާވެއްޖެ ނަމަ ވަރަށް އަވަހަށް ޔުމްނުއަށް އިށީނދެ އިނދެވޭ ވަރުވާނެ ކަމަށް އުއްމީދު ކުރައްވާ ކަމަށް ވެސް ވިދާޅުވި އެވެ.

ޔުމްނު ވެއްޓުނީ އޭޕްރީލް 18 ވަނަ ދުވަހު ހ. ފެންޓެނޯއީގޭގެ މަތީ ފްލޯއަކުން ނެވެ. އޭނާ ވެއްޓުނު އިރު އެތަނުގައި ރައުދު އަހުމަދު ޒިލާލް (21) އުޅުނު ކަމަށް ފުލުހުން ބުނެފައިވެ އެވެ. މި މައްސަލައިގެ ތަހުގީގަށް އެއްބާރުލުން ނުދިނުމުގެ ސަބަބުން ރައުދު ވަނީ ހައްޔަރުކޮށްފައެވެ.

.