ރައީސް ޑރ. މުހައްމަދު މުއިއްޒުގެ ސަރުކާރުގެ ފުރަތަމަ ދެ އަހަރަށް 100 އަކުން ދޭނީ 20 މާކްސް ކަމަށް ކުރީގެ ރައީސް އަބްދުالله ޔާމީން ރޭ ވިދާޅުވެއްޖެ އެވެ.

ރޭ ހުޅުމާލެ ފޭސް ދޭއްގައި "ރައިޒް އަޕް ޔޫތު" އިވެންޓުގައި މި ސަރުކާރަށް ވަރަށް ބޮޑަށް ފާޑުކިޔަމުން ޔާމީން ވިދާޅުވީ މިއަދު ރާއްޖޭގެ ހާލަތު ފަސް ގަރުނު ފަހަތަށް ގޮސްފައިވާ ކަމަށެވެ.

އެގޮތުން އިންޓެގްރިޓީ 10 މާކްސް، ރެސްޕޮންސިވްނެސް 5 މާކްސް އަދި ޓްރާންސްޕޭރެންސީ 2 މާކްސް ޔާމީން ވަނީ ދެއްވާފަ އެވެ. ސަރުކާރުގެ އެފިޝެންސީ އަށް ޔާމީން ދެއްވީ 3 މާކްސް އެވެ. 

''ނަތީޖާ ޝީޓަށް 100 އިން އަޅުގަނޑަށް ދެވެން މި އަންނަނީ 20 މާކްސް. ބިގް ޓައިމް ފެއިލިއާއެއް، ބިގް ޓައިމް ފެއިލިއާއެއް އިނގޭތޯ. އަޅުގަނޑު ބޭނުން މިކުރީ ސައިންޓިފިކް މެތޮޑޮލޮޖީ، އޭގައި ސުވާލެއް ނުއުފުދޭނެ'' ޔާމީން ވިދާޅުވި އެވެ.

އެމަނިކުފާނު ވިދާޅުވީ ރައީސް މުއިއްޒުގެ ސަރުކާރުގައި ރާއްޖޭގެ އިގުތިސޯދު ހީނަރުވެގެންދާއިރު އިންވެސްޓު ކުރަން ރާއްްޖެ އަންނަ ބަޔަކު ވެސް ނެތް ކަމަށެވެ. 

އަންނަ އަހަރުގެ ބަޖެޓާ ގުޅޭ ގޮތުން ޔާމީން ވިދާޅުވީ ދަރަނި ނަގައިގެން ކުރާ ކަންކަން ފެންނަން ޖެހޭ ކަމަށެވެ.