ވިލިމާލެއިން ދެ ނިކަ ގަސް ނެގުމަށް ފަހު އޭގެ ބަދަލުގައި އެ އަވަށުގައި 300 ގަސް އިންދާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

ހޯމަ ދުވަހުގެ ރޭ ވިލިމާލެ ރައްޔިތުންނާ އެކު ބޭއްވި ބައްދަލުވުމުގައި މީހަކު ވަނީ ވިލިމާލޭގައި ހުންނަ ދެ ނިކަ ގަހުގެ ސަބަބުން ރައްޔިތުންނަށް އުދަނގޫތަކެއް ކުރިމަތިވާ ކަމަށެވެ.

އެކަމުގެ ކަންބޮޑުވުން މީގެ ކުރިން ސިޓީ ކައުންސިލުގެ އިތުރުން ސަރުކާރުގައިވެސް އެދިފައިވާނެ ކަމަށާއި، އެހެންވެ އެކަމެއް ހައްލެއް ހޯދައި ދިނުމަށް އެ މީހާ ރައީސް އަރިހުގައި އެެދުނެވެ. 

ސުވާލަކަށް ޖަވާބުގައި ރައީސް ވަނީ ބައްދަލުވުމުގައި ތިބި މީހުންގެ ތެރެއިން އެ ގަސް އެތަނުން ނަގަން ބޭނުންވާ މީހުންގެ ވޯޓަށް އަހާފަ އެވެ. 

އަތް އުފުލައިގެން ނެގި ވޯޓުގައި މެޖޯރިޓީ މީހުން ވޯޓު ދިނީ އެ ގަސްތައް ނަގާށެވެ. 

''އެހެންވީމާ އިއްތިފާގުން ފާސްމިވީ (ގަސް ނަގަން) އެކަން ކުރިއަށްދާނެ'' ރައީސް ވިދާޅުވި އެވެ.

ރޭ ރައްޔިތުންނާ އެކު ބޭއްވި ބައްދަލުވުމުގައި ރައީސް ވިދާޅުވީ މި ސަރުކާރަކީ ދެމެހެއްޓެނިވި ތަރައްގީ އާއި ތިމާށީގެ މުހިންމުކަން ގަބޫލު ކުރާ ސަރުކާރެއް ކަމަށެެވ. އެގޮތުން ވިލިމާލެއިން ނަގާ ދެ ނިކަގަހުގެ ބަދަލުގައި 300 ގަސް އިންދާނެ ކަމަށް އެ މަނިކުފާނު ވިދާޅުވި އެވެ.