އައްޑޫ ސިޓީއަކީ ރާއްޖޭގެ ފުރަތަމަ ވިޔަފާރި ހަބަށް ހެދުމަށްޓަކައި އެ ތަނަށް އިންވެސްޓް ކުރުން އިތުރުކުރުމުގެ ގޮތުން ބިމު ކުއްޔާއި ޓެކްސް ނަގަން ނުޖެހޭ ގޮތަށް ހަދާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ. 

ރައީސްގެ ތިންވަނަ ރިޔާސީ ބަޔާން މިއަދު ރައްޔިތުންގެ މަޖިލިހުގައި އިއްވަވަމުން ވިދާޅުވީ ބިމު ކުއްޔާއި އިންކަމް ޓެކްސް ފަދަ ސީދާ ވިޔަފާރިތަކުން ދައުލަތަށް ދައްކާ ޓެކްސް ނުދައްކާ ގޮތަށް ވަކި ސަރަހައްދުތަކެއްގައި ވަކި މުއްދަތަކަށް ހެދުމަށް ބިންމާފައިވާ ކަމަށެވެ. 

އެ ގޮތުން އެފަދަ ފުރަތަމަ ވިޔަފާރީގެ ހަބަކީ، މާލެ ނެގުމަށް ފަހު އެންމެ އާބާދީ ބޮޑު އަދި ރާއްޖޭގެ އެންމެ ދެކުނުގައި އޮންނަ އައްޑޫ ކަން ރައީސް ފާހަގަކުރެއްވިއެވެ.

މި ލުއިތަކާއެކު އައްޑޫއަށް އިންވެސްޓްކުރުމަށް ހުޅުވާލާނީ އަންނަ އަހަރުން ފެށިގެން ކުރިއަށް އޮތް ތިން އަހަރު ދުވަހަށް ކަމަށް ވެސް ރައީސް ވިދާޅުވި އެވެ. 

"އެންމެ ފުރަތަމަ ހުޅުވާލާ ސަރަަހައްދެއްގެ ގޮތުގައި އައްޑޫ ސިޓީ އާއި އައްޑޫ ހުޅުދޫ އަދި އައްޑޫ މީދޫ ހިމެނޭހެން އައްޑު އަތޮޅަކީ 1 ޖެނުއަރީ 2027އިން ފެށިގެން ތިން އަހަރު ދުވަހަށް ކުދި އަދި މެދު ފަންތީގެ ވިޔަފާރިތަކަށް އިންވެސްޓުކުރުމަށް ގިނަ ލުއިތަކެއް ލިބިގެންދާނެ ސަރަހައްދެއްގެ ގޮތުގައި ކަނޑައަޅަން ނިންމާފައިވާ ކަން އިއުލާންކުރަން،" ރައީސް ވިދާޅުވި އެވެ.