ދުނިޔޭގެ އެންމެ ބޮޑު ޓޫރިޒަމް މައުރަޒު "އައިޓީބީ ބާލިން 2027" ގެ ރަސްމީ ހޯސްޓް ކަންޓްރީގެ ގޮތުގައި ރާއްޖެ ހަމަޖައްސައިފި އެވެ.

ޖަރުމަނުގެ މެސޭ ބާލިންގެ ހޯލް 5.2 ގައި ހުންނަ ރާއްޖޭގެ ސްޓޭންޑުގައި ބޭއްވި ރަސްމިއްޔާތެއްގައި، އެ އެއްބަސްވުމުގައި ސޮއިކުރެއްވީ ވިޒިޓް މޯލްޑިވްސް (އެމްއެމްޕީއާރުސީ)ގެ ސީއީއޯ އަދި މެނޭޖިން ޑައިރެކްޓަރު އިބްރާހީމް ޝިއުރީ އާއި މެސޭ ބާލިންގެ ސީއީއޯ ޑރ. މާރިއޯ ޓޯބިއަސް އެވެ.

ވިޒިޓް މޯލްޑިވްސް އިން ބުނީ، އައިޓީބީ ފެއާ ބާއްވަން ރާއްޖެއަށް ފުރުސަތު ލިބުމަކީ ބައިނަލްއަގުވާމީ ފަތުރުވެރިކަމުގެ ސިނާއަތުގައި އިންޑިއާ ކަނޑުގެ ޖަޒީރާ ގައުމުގެ ގުދުރަތީ ރީތިކަމާއި ސަގާފީ ތަފާތުކަމުގެ އިތުރުން ދިވެހިންގެ މެހެމާންދާރީ މުޅި ދުނިޔެއަށް ދައްކާލުމަށް ލިބިގެންދާ ރަނގަޅު ފުރުސަތެއް ކަމަށެވެ.

މެސޭ ބާލިންގެ ސީއީއޯ ޑރ. މާރިއޯ ޓޯބިއަސް ވިދާޅުވީ ރާއްޖެއަށް މި ފުރުސަތު ލިބިގެންދިއުމަކީ ވަރަށް ބޮޑު އުފަލެއް ކަމަށާއި، މިއީ ދެފަރާތުގެ މެދުގައި އޮތް ގާތް ގުޅުން ހާމަކޮށްދޭ ކަމެއް ކަމަށެެވެ. 

އަދި ބައިނަލްއަގުވާމީ ފަތުރުވެރިކަމުގެ މައިދާނުގައި ރާއްޖޭގެ ދައުރު ފުޅާވަމުންދާކަން ހާމަވާކަމަށް އޭނާ ފާހަގަކުރެއްވިއެވެ.

ވިޒިޓް މޯލްޑިވްސް އިން ބުނީ  އަންނަ އަހަރުގެ ހޯސްޓް ކަންޓްރީގެ ހައިސިއްޔަތުން، ރާއްޖޭގެ ޓޫރިޒަމް ހުރިހާ ދާއިރާއެއް އިޝްތިހާރު ކުރާނެ ކަމަށާއި އޭގެ ތެރޭގައި ރިސޯޓުތަކާއި ބުޓީކް ހޮޓާތަކާއި ޑައިވިން އާއި މޫދު ކުޅިވަރުތަކާއި ވެލްނަސް އަދި ސަގާފީ ޓޫރިޒަމްގެ އިތުރުން ތިމާވެށި ހިމާޔަތްކުރުމާއި ދެމެހެއްޓެނިވި ޓޫރިޒަމަށް ރާއްޖެއިން ކުރާ މަސައްކަތްތައް ވެސް މި މައުރަޒުގައި ދައްކާލާނެކަމަށެވެ.