މާލޭގައި 100 އަހަރު ވެފައިވާ ތާރީހީ މިސްކިތެއް ކަމަށްވާ ބަންޑާރަ މިސްކިތް ހުރި ތަނުގައި ޒަމާނީ ފެންވަރަށް ތަރައްގީކުރާ ބޮޑު މިސްކިތެއް އަޅަން ނިންމުމާމެދު ފުޅާ ދާއިރާއެއްގައި މަޝްވަރާކުރަން ބޭނުންވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅަން ބޭނުންވާ އެހީތެރިކަން ދީލަތި ފަރާތަކުން ހަމަޖައްސައިދީފައިވާ ކަމަށް މިނިސްޓަރު ޝަހީމް ވަނީ އިއްޔެ ވިދާޅުވެފަ އެވެ. އެ ތަނުގައި މިސްކިތް އެޅުމުގެ މަސައްކަތް ފަށާނީ، ރޯދައިގެ ފަހުން ކަމަށާއި އެ މިސްކިތާއެކު، މާލޭގެ ހުރިހާ ބޮޑެތި މިސްކިތްތައް އާވާނެ ކަމަށް ޝަހީމް ވިދާޅުވި އެވެ.

އެއާއެކު ސޯޝަލް މީޑިއާގައި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.  އެގޮތުން އެހާ ދުވަސްވީ މިސްކިތެއް ނެތިދާނެ ގޮތަށް އާ މިސްކިތެއް އަޅާތީ ކަންބޮޑުވުން ފާޅުކުރަމުން ކުރީގެ ހެރިޓޭޖް މިނސްޓަރު ޔުމްނާ މައުމޫނު ވިދާޅުވީ ބަންޑާރަ މިސްކިތް ތަޅާލުމަކީ އެއްގޮތަކަށް ވެސް ކޮށްގެންވާނެ ކަމެއް ނޫން ކަމަށެވެ.

އެއީ 98 އަހަރަށް ވުރެ ގިނަ ދުވަސް ވެފައިވާ މާލޭގެ މުހިންމު ދީނީ، ތާރީހީ ސަގާފީ ބިނާއެއް ކަމަށް ޔުމްނާ ވިދާޅުވި އެވެ. 

ޔުމްނާގެ އިތުރުން ދިވެހި ތާރީހު ދިރާސާކުރައްވައި އަދި ތާރީހީ ކަންކަން ހިމާޔަތްކުރަން ވަކާލާތުކުރައްވާ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. 

އެ ކަންބޮޑުވުންތަކާއެކު ރޭ ޝަހީމް ކުރެއްވި ޕޯސްޓެއްގައި ވިދާޅުވީ، ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމެނޭ މިސްކިތެއް ނޫން ކަމަށެވެ.

''ވީމާ އެތަނުގައި ބޮޑު މިސްކިތެއް ބިނާކުރަން ޤަސްތުކުރީ. މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށް. އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުން'' ޝަހީމް ވިދާޅުވި އެވެ.