އެމެރިކާއިން ވެނެޒުއޭލާގެ ރައީސް ނިކޮލަސް މަޑޫރޯ ހިފަހައްޓައި އޭނާ ގައުމުން ބޭރަށް ގެންގޮސްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއުލާންކުރައްވައިފި އެވެ.

ޓްރަމްޕް އެކަން އިއުލާން ކުރެއްވީ ވެނެޒުއޭލާގެ ވެރިރަށް ކަރަކަސްގައި ވަރުގަދަ ބޮމެއް ގޮއްވާލި ހާދިސާ ހިނގިތާ އިރުކޮޅެއްގެ ތެރޭގަ އެވެ. ވެނެޒުއޭލާއަށް އެމެރިކާއިން ދިން ވައިގެ ހަމަލާތަކުގައި އެ ގައުމުގެ މިލިޓަރީ ސައިޓްތަކާއި އެކި ހިސާބުތަކަށް ވަނީ ގެއްލުން ލިބިފަ އެވެ. އެއާއެކު އެ ގައުމުގައި ކުއްލި ނުރައްކަލުގެ ހާލަތު އިއުލާންކޮށްފައިވެ އެވެ.

ޓްރަމްޕް ވިދާޅުވީ އެމެރިކާއިން ހިންގި އެ އޮޕަރޭޝަންގައި މަޑޫރޯގެ އަނބިކަނބަލުން ސިލިއާ ފްލޯރެސް ވެސް އެމެރިކާގެ ބާރުގެ ދަށަށް ގެނެސްފައިވާ ކަމަށެވެ. 

އެޓާނީ ޖެނެރަލް ޕާމް ބޮންޑީ ނެރުއްވި ބަޔާނެއްގައި ވިދާޅުވީ މަޑޫރޯ އާއި އޭނާގެ އަނބިކަނބަލުންގެ މައްޗަށް ނިއު ޔޯކްގެ ސަދަން ޑިސްޓްރިކްޓްގައި ދައުވާ އުފުލާފައިވާ ކަމަށެވެ.

ބޮންޑީ ވިދާޅުވީ މަޑޫރޯގެ މައްޗަށް އުފުލާފައިވަނީ ޓެރަރިޒަމް ރޭވުމުގެ ދައުވާ އާއި ކޮކެއިން އެތެރެ ކުރުމުގެ ދައުވާ ކަމަށެވެ. މަޑޫރޯގެ އަނބިކަނބަލުންގެ މައްޗަށް ވެސް އެ ދައުވާތައް އުފުލާފައިވާ ކަމެއް ނުވަތަ ނޫންކަން އަދި ސާފު ނުވި ނަމަވެސް، މަޑޫރޯ އެ ދެމަފިރިން ސިފަ ކޮށްފައި ވަނީ "އިންޓަނޭޝަނަލް ނާކޯ ޓްރެފިކާ" އެއްގެ ގޮތުގަ އެވެ.