ތ. ވަންދޫ ރަށު ކައުންސިލުން އެ ރަށު ސްކޫލު އޭސީކޮށްދީފިއެވެ.

ވަންދޫ ކައުންސިލްގެ ރަސްމީ ފޭސްބުކް ޕޭޖުން މިއަދު ކުރި ޕޯސްޓެއްގައި ބުނީ، ކައުންސިލަރުންގެ ވައުދާ އެއްގޮތަށް އެ ރަށު ސްކޫލު އޭސީކޮށް އޭގެ ހިދުމަތް މިހާރު ލިބޭނެ ކަމަށެވެ. ވަންދޫ ކައުންސިލުން ވަނީ 12 އޭސީ ސްކޫލަށް ހަދިޔާކޮށް، އެ އޭސީތައް ހަރުކޮށްދީފައެވެ. 

ވަންދޫ ކައުންސިލުން ބުނީ، އެ މަސައްކަތް ކާމިޔާބު ކުރުމުގައި ވަރަށް ގިނަ ފަރާތްތަކެއްގެ އެއްބާރުލުމާއި އެހީ ކައުންސިލަށް ލިބިފައިވާ ކަމަށެވެ.

އެގޮތުން ކައުންސިލްގެ މެމްބަރުން އަމަލީ ގޮތުން އެ މަސައްކަތުގައި ބައިވެރިވެފައިވާތީ މެމްބަރުންނަށާއި، އތމ ކޮމިޓީ އާއި ވަންދޫ ސުކޫލާއި ޕީޓީއޭ އާއި ފެނަކަ އާއި، އެ ރަށު ސިއްހީ މަރުކަޒާއި އެރަށު ޕޮލިސް ސްޓޭޝަނާއި ނެވިން ސްޕޯޓްސް ކްލަބުގެ މުހައްމަދު ޝާހިދު އަދި އަބްދުލް ހަމީދުގެ ޓީމަށް ޝުކުރު އަދާ ކުރާ ކަމަށް ކައުންސލުން ބުންޏެވެ. 

މީގެ އިތުރުންވެސް އެ މަސައްކަތުގައި އެއްބާރުލުން ދީފައިވާ އެންމެހާ ފަރާތްތަކަށްވެސް ކައުންސިލުން ވަނީ ޝުކުރު އަދާކޮށްފައެވެ. 

ކައުންސިލްތަކުގެ އަމިއްލަ އިސް ނެގުމަށް މީގެ ކުރިންވެސް ބައެއް ރަށްރަށުގެ ސްކޫލުތައް އޭސީކޮށްދީފައި އެބަހުއްޓެވެ. ދިރާސީ އާ އަހަރުގެ ކިޔެވުން ފެއްޓުނު ދުވަހާ ގުޅުވައި މިއަދު ދެއްވި ހިތޯބުގައި އެޑިއުކޭޝަން މިނިސްޓަރު ވަނީ "ކޫލް ސްކޫލް" ޕްރޮގްރާމްގެ ދަށުން ސަރުކާރު ސްކޫލްތަކުގައި ހުރި 3740 ކުލާސްރޫމް މި އަހަރު ސެޕްޓެމްބަރު މަހުގެ ނިޔަލަށް އޭސީކޮށް ނިންމާލުމަށްޓަކައި ވާންޖެހޭ ތައްޔާރީތައްވެ ނިމިފައިވާ ކަމަށް ވިދާޅުވެފައެވެ.