ރާއްޖޭގެ ސަރަހައްދުގެ ވައި އާދަޔާހިލާފަށް ނުސާފުވުމުގެ ސަބަބުން ލޮލަށް ފެންނަ ދުރުމިން ދަށްވެ ވައިގެ ދަތުރުފަތުރަށް ދިމާވެފައިވާ ދަތިތަކާ ގުޅިގެން، ވައިގެ ދަތުރުތަކުގެ ރައްކާތެރިކަން ކަށަވަރު ކުރަން ފިޔަވަޅުތަކެއް އަޅާފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނެފި އެވެ.

އެމްއޭސީއެލުން އިއްޔެ ނެރުނު ބަޔާނެއްގައި ބުނީ އެއްވެސް ސަބަބަކާހުރެ ދުރަށް ފެންނަ މިންވަރު ދަށްވެއްޖެނަމަ ދަތުރުކުރުމުގައި އިތުރު ރައްކާތެރިކަމުގެ ފިޔަވަޅު އެޅުމަކީ އެ ކުންފުނީގެ ޒިންމާއެއް ކަމަށްވާއިރު، ވިޝުއަލް ފްލައިޓް ރޫލްސް (ވީއެފްއާރު) ވަގުތީ ގޮތުން މަޑުޖައްސާލައި, އިތުރު އެހީތެރިކަން ލިބޭނެ ގޮތަކަށް ސްޕެޝަލް ވީއެފްއާރު (އެސްވީއެފްއާރު) އަށް ދަތުރު ކުރުމަށް އަންގާފައިވާ ކަމަށެވެ.

ދުރަށް ފެންނަ މިންވަރު ފަސް ކިލޯމީޓަރަށްވުރެ ދަށްވުމުން ވީއެފްއާރު ވަގުތީ ގޮތުން މަޑުޖައްސާލައި, އެސްވީއެފްއާރުގެ ގޮތުގައި ދަތުރު ކުރުމަށް މަތިންދާބޯޓުތަކަށް އެންގުމަކީ މޯލްޑިވްސް ސިވިލް އޭވިއޭޝަން އޮތޯރިޓީގެ ގަވާއިދުތަކާއި އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަންގެ ގަވާއިދުތަކާ އެއްގޮތަށް ކުރަމުން އަންނަ ކަމެކެވެ. 

(އެޗްޕީއޭ)އިން ލަފާކުރާ ގޮތުގައި ބުރާސްފަތި ދުވަހުން ފެށިގެން އަންނަ ހޯމަ ދުވަހުގެ ނިޔަލަށް ދުންފުހުގެ އަސަރު ރާއްޖެ އަށް ހުންނާނެ އެވެ.