މީހުން ދިރިއުޅޭ ރަށްރަށުގައި ރަލާއި އޫރުމަސް ހުއްދަކުރަން ނުޖެހޭ ކަމަށާއި، އެމަނިކުފާނު ދެއްކެވި ވާހަކަފުޅު ފަތުރަނީ މާނަ އޮޅުވާލައިގެން ކަމަށް، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ކ. މާފުށީގެ ރަސްމިއްޔާތެއްގައި ނަޝީދު ވިދާޅުވީ ލޯކަލް ޓޫރިޒަމް ކުރިއެރުވުމަށްޓަކައި ރިސޯޓުތަކުގައި ވިއްކާ "ތަކެތި" ފަތުރުވެރިކަމުގެ ހޮޓާތަކުގައި ވިއްކަންޖެހޭ ކަމަށެވެ. އެކަމަކު އެއީ ސީދާ ރަލާއި އޫރުމަސް ކަމެއް ނަޝީދު ވިދާޅެއް ނުވެ އެވެ. އެކަމަކު އެއީ ރަލާއި އޫރުމަސް ކަމަށް ބުނެ ނަޝީދަށް ފާޑުކިޔުންތައް ވަނީ އަމާޒުވެފަ އެވެ.

ފާޑުކިޔުންތަކަށް ރައްދު ދެއްވައި އެމަނިކުފާނު ވިދާޅުވީ ސާފު ބަހުން ދެއްކެވި ވާހަކަފުޅު، ކަނޑައެޅިގެން އިދިފުށަށް، ދޮގު މާނައާއި ތަރުޖަމާ އީޖާދުކޮށްގެން ފަތުރަނީ ކަމަށެވެ. އަދި އެފަދަ އަމަލުތަކަކީ މީހުންނަށް ގެއްލުންދޭން މަސައްކަތްކުރުން ކަމަށާއި، އެކަމާ ކަންބޮޑުވެވަޑައިގަންނަވާ ކަމަށް ވިދާޅުވި އެވެ.

ރަށްރަށުގައި ހުންނަ ފަތުރުވެރިކަމުގެ ހޮޓާތަކުން ނުލިބޭ ހަމައެކަނި ތަކެއްޗަކީ ރަލާއި އޫރުމަސް ނޫން ކަމަށާއި، ބައެއް އެހެން ހިދުމަތްތައް ނުލިބޭކަން ނަޝީދު ފާހަގަކުރެއްވި އެވެ.

ރަށްރަށުގެ ގެސްޓްހައުސްތަކާއި ފަތުރުވެރިކަމުގެ ހޮޓާތަކުގައި ރަލާއި އޫރުމަސް ވިއްކުން ހުއްދަކުރުމަކީ ސަރުކާރުގެ ސިޔާސަތެއް ނޫން ކަމަށް ސަރުކާރުން ވަނީ މިއަދު ބުނެފަ އެވެ.