ޕްރައިވެޓް އިންޝުއަރެންސް ނަގާފައިވާ ފަރާތްތަކަށް ބޭސްފަރުވާކުރުމުގައި އާސަންދަ ވެސް ލިބޭނެ ގޮތަށް އުސޫލަށް ބަދަލުގެނެސް އަމަލުކުރަން ފަށައިފި އެވެ. 

ޕްރައިވެޓް އިންޝުއަރެންސް ނަގާފައިވާ ފަރާތްތަކުން، ލިމިޓް ހަމަވުމުން ނޫނީ އާސަންދަ ކަވަރޭޖް ނުލިބޭ ގޮތަށް މިދިޔަ ނޮވެމްބަރު މަހު ބަދަލު ގެނައެވެ. މިއާ އެކު ގިނަ ބަޔަކު އަންނަނީ އެ ނިންމުމާ ދެކޮޅުހަދައި ނުރުހުން ފާޅުކުރަމުންނެވެ. 

އާސަންދައިން މިއަދު ނެރުނު ބަޔާނުގައި ބުނީ، ޕްރައިވެޓް އިންޝުއަރެންސް ނަގާފައިވާ ފަރާތްތަކުން އެނދުމަތި ނުވެ ހޯދާ ސިއްހީ ހިދުމަތްތަކަށް ފުރަތަމަ ޕްރައިވެޓް އިންޝުއަރެންސާ އެކު، އާސަންދަ ސްކީމުން އެ ހިދުމަތަކަށް ކަނޑައަޅާފައިވާ އަދަދު ލިބޭނެ އިންތުޒާމު ހަމަޖެއްސުމަށް ނިންމާފައިވާކަމަށެވެ. 

އަލަށް ގެންނަން ނިންމި ބަދަލުތަކާ އެކު ބުދަ ދުވަހުން ފެށިގެން ޑޮކްޓަރަށް ދެެއްކުމަށް ނަގާ ކޮންސަލްޓަންޓް ފީ މި އުސޫލުން ތަންފީޒުކުރަން ވަނީ ފަށާފަ އެވެ. އަދި މިމަހުގެ 27 ވަނަ ދުވަހުން ފެށިގެން އެހެން ހިދުމަތްތަކަށް ވެސް މި އުސޫލުން އަމަލުކުރަން ފަށާނެކަމުގައި އާސަންދަ ކުންފުނިން ބުނެ އެވެ. 

މި ބަދަލާ އެކު ސިއްހީ ހިދުމަތްތަކަށް ބިލުކުރާ އިރު ފުރަތަމަ ޗާޖުކުރާނީ ޕްރައިވެޓް އިންޝުއަރެންސުންނެވެ. އަދި ބާކީ ބައި އާސަންދަ ލިިމިޓުގެ ތެރެއިން ކަވަރުކުރާނެ އެވެ.