މޮނާސް ޔުނިވާސިޓީގައި ކިޔަވަމުންދާ އަހުމަދު އުސައިދު އިބްރާހިމް (24އ) ގެއްލިގެން ހޯދަން ފަށާފައިވަނީ މި ހަފްތާގެ އާދިއްތަ ދުވަހުއެވެ.

އޭނާ ގެއްލުމާ ގުޅިގެން އާއިލާ އާއި ރައްޓެހިން އަދި ހެޔޮއެދޭ ފަރާތްތަކުން އެވަގުތުން ފެށިގެން އުސެއިދު ހޯދުމުގެ މަސައްކަތް ފެށިއެވެ. މިއަދު މެލޭޝިއާގެ ފުލުހުންގެ ބެލުމުގެ ދަށުގައި ހުރުމަށްފަހު މިހާރު އުސެއިދް މިވަނީ ހެޔޮ ހާލުގައި އާއިލާއާއި ބައްދަލުވެފަ އެވެ.

މިދިޔަ އާދިއްތަ ދުވަހުގެ ހަވީރު 3 ޖަހާއިރު އާއިލާއިން މި މައްސަލަ ކަމާ ބެހޭ ފަރާތްތަކަށް އެންގި އެވެ. އަދި މެލޭޝިއާގައި ހުންނަ ރާއްޖޭގެ އެމްބަސީ އަދި އެގައުމުގެ ކަމާއިބެހޭ ފަރާތްތަކާއި ގުޅިގެން އުސެއިދު ހޯދުމުގެ މަސައްކަތް ފެށި އެވެ. 

އާއިލާއިން ކަންބޮޑުވުން ފާޅުކޮށް އުސައިދުގެ ބައްޕަ އަދި ރައްޔިތުން މަޖިލީހުގެ ބ.އަތޮޅު ދާއިރާގެ ކުރީގެ މެމްބަރު އިބްރާހިމް އަފީފް ސޯސަލް މީޑިއާގައި ޕޯސްޓުތަކެއް ކުރެއްވި އެވެ. އާންމުންގެ އެހީތެރިކަމަށް ވެސް އަފީފް އެދިވަޑައިގެންނެވި އެވެ.

އަދި އުސެއިދުގެ މައްސަލަ ކުރިއަށްދާ ގޮތުގެ ތަފްސީލުތައް ވެސް އަފީފް ގެންދެވީ ސޯޝަލް މީޑިއާގައި ހިއްސާ ކުރައްވަމުންނެވެ.

މިއާއެކު އުސައިދުގެ ބައްޕަ ވިދާޅުވެފައިވަނީ އުސައިދު އުޅުނީ އެކަނިވެރި ވެގެން ކަމަށާއި، އޭނާ އެވާހަކަ މަންމައާ ބައްޕަ ކައިރީ ހިއްސާ ކޮށްފައިވާ ކަމަށެވެ.

އަދި އެމްބަސީއަށް ދިޔައީ ރެސްޓް ކޮށްލަން ކަމަށާއި، ބަންދު ދުވަހަކަށް ވާތީ އެމްބަސީ ބަންދުކޮށްފައި ހުރުމުން އެމްބަސީ ހިނގާ އިމާރާތުގެ ބޭރު ބައިގައި ޖައްސާލައިގެން އޮތް މަންޒަރު ސީސީޓީވީ ފްޓޭޖްއިން ފެންނަން އޮތް ކަމަށެވެ.

މިހާރު އާއިލާއާއި އުސެއިދު ބައްދަލުވެފައި ވާއިރު އުސެއިދުގެ ބައްޕަ ވަނީ އުސެއިދްގެ ހާލު ރަނގަޅު ކަމަށާއި، ސިއްޙީ އެއްވެސް މައްސަލައެއް އުސެއިދުގެ ނުހުންނާނެ ކަމަށްވެސް ވިދާޅުވެފަ އެވެ.