އެމެރިކާގެ ރައީސް ޑޮނަލްޑް ޓްރަމްޕްގެ ވިޔަފާރި ކުންފުނި " ދަ ޓްރަމްޕް އޮގަނައިޒޭޝަން" އިން ރާއްޖޭގައި ރިސޯޓެއް ގާއިމް ކުރާކަން އިއުލާނުކޮށްފިއެވެ.

އޯގަނައިޒޭޝަނުން ނެރުނު ބަޔާނެއްގައި ބުނެފައިވަނީ މި ރިސޯޓު ގާއިމް ކުރާނީ މާލެއިން ފުރައިގެން ގާތްގަނޑަކަށް 25 މިނިޓުން ދެވޭ ރަށެއްގައި ކަމަށެވެ. އަދި މި ރިސޯޓު ގާއިމް ކުރަނީ 80 އަށްވުރެ ގިނަ އަލްޓްރާ ލަގްޒަރީ ބީޗާއި މޫދު ކޮޓަރި ހިމެނޭ ގޮތަށް ކަމަށް ވެސް ބުނެފައިވެއެވެ.

ޓްރަމްޕް ގެ ދަރިކަލުން ޓްރަމްޕް އޮގަނައިޒޭޝަން ގެ ނައިބު ރައީސް ވިދާޅުވީ ޓްރަމްޕް ބްރޭންޑް ރާއްޖެއަށް ތައާރަފް ކުރެވުމަކީ ލިބޭ ވަރަށް ބޮޑު އުފަލެއް ކަމަށާއި އެއާއެކު ލަގްޒަރީ އާއި ރިއަލް އެސްޓޭޓް އިންވެސްޓްމަންޓްގެ މުޅިން އާ ބެންޗު މާލެއާ ކަނޑައެޅިގެންދާނެނކަމަށެވެ.

ޓްރަމްޕް ބްރޭންޑް އިން ބުނީ މި އެއްބަސްވުމުގެ ސަބަބުން ދުނިޔޭގެ އެންމެ މަގުބޫލު މަންޒިލް ކަމަށްވާ ރާއްޖެއަށް ޓްރަމްޕް ބްރޭންޑް ގެންދިއުމުގެ އިތުރުން، ފުރަތަމަ ފަހަރަށް އެހެން އިންވެސްޓަރުންގެ ބައިވެރިވުން ވެސް ހިމެނޭ ގޮތަށް ފަތުރުވެރިކަމުގެ މަޝްރޫއެއް ތަރައްގީ ކުރުމުގެ ފުރުސަތު ލިބިގެންދާނެ ކަމަށެވެ.

މީގެ އިތުރުން ޓްރަމްޕް އޯގަނައިޒޭޝަނުން ބުނީ މި ރިސޯޓު ހުޅުވުމަށް ހަމަޖެހިފައިވަނީ 2028 ވަނަ އަހަރުގެ ފަހު ކޮޅު ކަމަށެވެ.