ދުނިޔޭގެ ޓޫރިޒަމް ދުވަހާ ގުޅުވައިގެން ބ.އަތޮޅުގައި ވޯލްޑް ރެކޯޑެއް ހަދަން ތައްޔާރުވެއްޖެއެވެ.

ރެކޯޑް ހެދުމަށްޓަކައި ފްރީޑައިވް މޯލްޑިވްސް އާއެކު ބ.އަތޮޅު ކައުންސިލުން ވަނީ ސޮއިކޮށްފައިކަމަށް އެ އަތޮޅު ކައުންސިލުން އާންމުކުރި ބަޔާނުގައި ވެއެވެ. 

މި އެއްބަސްވުމުގައި ފްރީޑައިވް މޯލްޑިވްސްގެ ފަރާތުން ސޮއިކުރެއްވީ ފަހުދު ފާއިޒެވެ. ބ.އަތޮޅު ކައުންސިލްގެ ފަރާތުން އެ އަތޮޅު ކައުންސިލްގެ ރައީސް އަހުމަދު އަފްރާހެވެ.

"ބާނި" ނަމުގައި މި ހަރަކާތް ކުރިއަށްގެންދިއުމަށް ނިންމާފައިވާއިރު މި ހަރަކާތް ކުރިއަށް ގެންދިއުމަށް ހަމަޖައްސާފައިވަނީ އެ އަތޮޅުގެ އަނގަފަރު ސަރަހައްދަށް އެއްފަހަރާ ހާހެއްހާ މީހުން ޖަމާވެ ފީނައިގެންކަމަށް ބ.އަތޮޅު ކައުންސިލުން ނެރުނު ބަޔާނުގައިވެއެވެ.

މި ހަރަކާތާއި ގުޅޭގޮތުން ފްރީޑައިވް މޯލްޑިވްސްއިން ބުނެފައި ވަނީ ހަރަކާތުގައި އެ އަތޮޅުގެ ރަށްތަކުގެ އިތުރުން ރިސޯޓްތަކާއިއެކު މުޅި ރާއްޖެއަށްވެސް ބައިވެރިވެވޭގޮތަށް ހުޅުވާލާނެ ކަމަށެވެ.

ދުނިޔޭގެ ރެކޯޑް ހެދުމަށް މި އަހަރު ބާއްވާ މި ހަރަކާތަކީ އަތޮޅުތެރޭގައި ފުރަތަމަ ފަހަރަށް ބޭއްވޭ ހަރަކާތެއްކަމަށް އެ އަތޮޅު ކައުންސިލުން ބުނެފައިވެއެވެ. އެ ހަރަކާތުގެ ޕާޓްނަރުންގެ ގޮތުގައި ބ.އަތޮޅު ބޮސްފިޔާ ރިސާވްއާއެކު އެއްބަސްވުމެއް ހެދުމަށް ހަމަޖެހިފައިވާކަމަށްވެސް އެ އަތޮޅު ކައުންސިލުން ބުނެފައިވެއެވެ. 

ބ. އަތޮޅު ކައުންސިލުން އިތުރަށް ބުނި ގޮތުގައި އެ ހަރަކާތުގެ މައިގަނޑު މަގްސަދަކީ ތިމާވެއްޓަށްކުރާ ނޭދެވޭ އަސަރުތަކަށް މީހުން ހޭލުންތެރިކުރުވުމާއި ބ.އަތޮޅަކީ ޝައުގުވެރި ކުރަނިވި ފަތުރުވެރި މަންޒިލެއް ގޮތުގައި މުޅި ދުނިޔެއަށް އިޝްތިހާރުކުރުން ކަމަށެވެ.