ތިނެއް ނޮވެމްބަރު ނަވާރަ ސަތޭކަ އަށްޑިހަ އަށެއްގައި ރާއްޖެއަށް ދިން އުދުވާނީ ހަމަލާގައިޝަހީދުވި ސިފައިންގެ އާއިލާތަކާއި، އަދި އެ ހަމަލާގައި އާދަޔާ ހިލާފު ހިތްވަރަކާ ސާބިތުކަން ދައްކުވައިދިން ސިފައިންނަށް އިނާޔަތް ދިނުމަށް ސަރުކާރުން ނިންމައިފިއެވެ. 

މިނިސްޓްރީ އޮފް ޑިފެންސުން މިއަދު ބުނެފައިވަނީ ރައީސުލްޖުމްހޫރިއްޔާ ޑރ.މުއިއްޒުގެ ވައުދުފުޅާ އެއްގޮތަށް ދިވެހި ގައުމާ ރައްޔިތުން ސަލާމަތް ކުރުމުގައި ޖިހާދުކޮށް ޝަހީދުވެފައިވާ ސިފައިންނާއި، އަދި އުދުވާނީ ހަމަލާގައި ރާއްޖެ ދިފާއު ކުރުމުގައި އާދަޔާ ހިލާފު ހިތްވަރާއި ސާބިތުކަން ދައްކުވައިދެއްވައިފައިވާ ފަރާތްތަކުން އިސްލާމްދީނާއި، ރާއްޖޭގެ ލޮބުވެތި ވަތަނާއި ދިވެހި ރައްޔިތުންގެ ހައްގުގައި ވެވަޑައިގަންނަވާފައިވާ ގުރުބާނީއާ ކުރައްވާފައިވާ މަތިވެރި ޖިހާދުގެ އަގު ވަޒަންކޮށް ޝަހީދުންގެ އާއިލާތަކަށާއި އާދަޔާ ހިލާފު ހިތްވަރަކާއި ސާބިތުކަމެއް އެދުވަހު ދައްކުވައިދެއްވި ސިފައިންގެ ތެރެއިން ދުނިޔޭގައި ތިއްބެވި ފަރާތްތަކަށް ސަރުކާރުންދޭ ރަމްޒެއް ގޮތުގައި މި އިނާޔަތް ދިނުމަށް ކަނޑައަޅާފައިވާކަމަށެވެ.

މިގޮތުން ތިނެއް ނޮވެމްބަރުގެ އުދުވާނީ ހަމަލާގައި ހަނގުރާމަކޮށް ޝަހީދުވި ސިފައިންގެ އާއިލާތަކަށާއި އެ ހަނގުރާމައުގައި ދައްކުވައިދެއްވި އާދަޔާ ހިލާފު ހިތްވަރާއި ސާބިތުކަމުގެ ސަބަބުން ސަރުކާރުގެ ފަރާތުން މެޑަލް ފޯ އެކްސެޕްޝަނަލް ބްރޭވަރީ އަދި މެޑަލް ފޯ ބްރޭވަރީގެ ޝަރަފު އެރުވިފައިވާ ބޭފުޅުންނަށް ކަނޑައެޅިފައިވާ އުސޫލުގެ ތެރެއިން ދެމެހެއްޓެނިވި ގޮތެއްގައި ހާއްސަ އެލަވަންސެއް ދެއްވުމަށް ރައީސް ޑރ.މުއިއްޒު ނިންމަވާފައިވާކަމަށް މި ބަޔާނުގައި ބުނެފައިވެއެވެ. 

ރައީސް އޮފީހުން މިއަދު ވަނީ "ނޮވެންބަރު 1988 ގެ ހަނގުރާމައިގައި ޝަހީދުވި ސިފައިންގެ އާއިލާތަކާއި އަދި އެ ހަނގުރާމައިގައި ދައްކުވައިދިން އާދަޔާހިލާފު ހިތްވަރު ފާހަގަކޮށް ޝަރަފުގެ ނިޝާން ދެވިފައިވާ ފަރާތްތަކަށް އިނާޔަތް ދިނުމުގެ އުސޫލު" ގެޒެޓުކޮށްފައެވެ.

އެ އުސޫލުގައިވާ ގޮތުން މާލީ އިނާޔަތް ހައްގުވާ ދެ ފަރާތަކަށެވެ. އެއީ 3 ނޮވެންބަރު 1988 ގެ ހަނގުރާމައިގައި ޝަހީދުވި ސިފައިންގެ އާއިލާތަކާއި އެ ހަނގުރާމައިގައި ދައްކުވައިދިން އާދަޔާހިލާފު ހިތްވަރު ފާހަގަކޮށް ޝަރަފުގެ ނިޝާން ދެވިފައިވާ ފަރާތްތަކެވެ.

ތިނެއް ނޮވެންބަރުގެ ހަނގުރާމައިގައި ޝަހީދުވި ސިފައިންގެ އާއިލާއަށް މަހަކު 9،000 ރުފިޔާ ދޭނެ ކަމަށް އުސޫލުގައިވެއެވެ. އަދި ނޮވެންބަރުގައި އަމިއްލަ ހަށިގަނޑަށާއި ފުރާނައަށް ބެލުމެއްނެތި ދައްކުވައިދިން ޖެހިލުންކުޑަ އަދި ހިތްވަރުގަދަ އަމަލުގެ ސަބަބުން ހަނގުރާމަ ކާމިޔާބުވުމަށް މަގުފަހިކޮށްދިންކަން ފާހަގަކޮށް، ހުރަވީ ރަން މެޑެލި ދީފައިވާ ފަރާތްތަކަށް، އެ ފަރާތްތައް ދުނިޔޭގައި ހުރިހައި ދުވަހަކު މަހުން މަހަށް 9،000 ރުފިޔާ ދޭންވާނެ ކަމަށް ބުނެފައިވެއެވެ.

މީގެ އިތުރުން  ހަނގުރާމައިގައި އަމިއްލަ ހަށިގަނޑަށާއި ފުރާނައަށް ބެލުމެއްނެތި ދައްކުވައިދިން ޖެހިލުންކުޑަ އަދި ހިތްވަރުގަދަ އަމަލު ފާހަގަކޮށް، ހުރަވީ ރިހި މެޑެލި ދެވިފައިވާ ފަރާތްތަކަށް، އެ ފަރާތްތައް ދުނިޔޭގައި ހުރިހައި ދުވަހަކު ކޮންމެ މަހަކު 8،000 ރުފިޔާ ދޭންވާނެ ކަމަށް އުސޫލުގައި ބުނެފައިވާއިރު، ހިތްވަރުގަދަކަމުގެ ކުލަ ދެވިފައިވާ ފަރާތްތަކަށް، އެ ފަރާތްތައް ދުނިޔޭގައި ހުރިހައި ދުވަހަކު މަހުން މަހަށް ދޭ ފައިސާގެ އިނާޔަތުގެ ގޮތުގައި 6،000 ރުފިޔާ ލިބިދޭން ޖެހޭނެ ކަމަށް އުސޫލުގައިވެއެވެ.

ނޮވެމްބަރު ތިނެއްގެ އުދުވާނީ ހަމަލާގައި އަށް ސިފައިންގެ ބޭކަލުންނާއި 11 އާންމު ރައްޔިތުންނާއެކު ޖުމުލަ 19 ދިވެހިން ޝަހީދުވެފައިވެއެވެ.