ރާއްޖެއަށް ތެލާއި ކާބޯތަކެތި ގެނައުމުގައި އެއްވެސް ދައްޗެއް ނެތްކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި ކުރިއަށްދާ ޕްރެސް ގައި ރައީސް މުއިއްޒު ވިދާޅުވީ މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން ރާއްޖެއަށް ކުރާ އަސަރު ދެނެގަނެ އަދި އަވަސް ފިޔަވަޅުތަކެއް އެޅުއްވުމަށް  ޚާއްޞަ ކޮމިޓީއެއް އެކުލަވާލައްވާފައިވާ ކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވީ، ކޮމެޓީން ކަމާއި ގުޅުންހުރި ހުރިހައި ދާއިރާއަކުން ކަންކަން ބަލަމުންދާ ކަމަށެވެ. އެގޮތުން ރާއްޖެއިން ބޭރުގައި އުޅޭ ދިވެހިންނާއި އަދި ކިޔަވާ ކުދިންގެ ހާލުވެސް ބަލަމުންދާ ކަމަށާއި، ރާއްޖޭގެ އިގްތިސާދަށް ދިމާވެދާނެ ދަތިތައް ބަލަމުންދާ ކަމަށްވެސް ވިދާޅުވި އެވެ.

އަދި މިވަގުތު ތެލާއި ކާބޯތަކެތި ލިބުމުގައި އެއްވެސް ދައްޗެއް ނެތްކަމަށް ރައީސް ވިދާޅުވި އެވެ.

"ތެލަށް އިރާދަކުރެއްވިއްޔާ އެއްވެސް ވަރެއްގެ ކަންބޮޑުވުމެއް އަޅުގަނޑުމެންނަކަށް ދިމަލެއްނުވޭ. އަޅުގަނޑުމެންނަށް ހަމަ ރަނގަޅަށް އެކަން އޮތީ ހަމަޖެހިފައި. އެއްވެސް ވަރަކަށް ތެޔޮ ކުރިއަށް އޮތް ދުވަސްތަކުގައި އަޅުގަނޑުމެންނަށް ނުލިބޭނެ ކަހަލަ ގޮތަކަށެއް އަދި ނެތް އެއްވެސް ވަރަކަށް ކަންބޮޑުވާންޖެހޭ ކަހަލަ އެއްވެސް ކަމެއް" ރައީސް ވިދާޅުވި އެވެ.

ރާއްޖެއިން ނުފުރި ތިބި ފަތުރުވެރިންނަށްވެސް އަލްޓަނޭޓިވް ފްލައިޓްތައް ހޯދައި ރާއްޖެއިން ފުރޭނެ އިންތިޒާމްތައް ހަމަޖެއްސުމުގެ މަސައްކަތް ކުރައްވަމުން ގެންދަވާ ކަމަށްވެސް ރައީސް ވިދާޅުވި އެވެ.