ތެލަސީމިއާ ސެންޓަރާ ގުޅިގެން ފެންމަތިވެފައިވާ މައްސަލަތައް ހައްލުކުރުމަށް ޑިރެކްޓަރަކު ކަނޑައަޅައި މުވައްޒަފުން ހޯދަން އިއުލާންކޮށްފި އެވެ. 

ސިއްހީ ވުޒާރާއިން ތެލަސީމިއާ ސެންޓަރު ހިންގާ އެންމެ އިސްވެރިއެއްގެ މަގާމަށް މިއަދު އައްޔަންކޮށްފައި ވަނީ އަހުމަދު މައުސޫމް އެވެ.

މައުސޫމް ވަނީ މެނޭޖްމެންޓާއި ހިންގުމުގެ ދާއިރާއިން ތަޖުރިބާކާރު ބޭފުޅެއް ކަމަށް އެ ވުޒާރާއިން ބުނެ އެވެ. 

މީގެ ކުރިން މައުސޫމް ވަނީ އައިޖީއެމްއެޗްގައި މަސައްކަތް ކުރައްވާފައެވެ.

ސިއްހީ ވުޒާރާއިން ބުނީ، މި ތަނުގެ ޑެޕިއުޓީ ޑިރެކްޓާ ޖެނެރަލްއަކާއި ޑިރެކްޓަރެއްގެ މަގާމަށް ވެސް ވަރަށް އަވަހަށް ބޭފުޅުން އައްޔަންކުރައްވާނެ ކަމަށެވެ. 

މީގެ އިތުރުން ތެލަސީިމިއާ ސެންޓަރުގެ ފިޒީޝަނެއް ވެސް ވަރަށް އަވަހަށް ހަމަޖެހިގެން ދާނެ ކަމަށް ބުންޏެވެ. މި ވަގުތަށް ބޭނުންވާ ފަސް ނަރުހުން ހޯދުމަށް ވެސް މިއަދު ވަނީ އިއުލާންކޮށްފަ އެވެ.

މިއާ އެކު އެހެނިހެން އިދާރީ މަގާމުތަކަށް ވެސް މީހުން ކަނޑައަޅައި، އެ ސެންޓަރުގެ މައްސަލަތައް ހައްލުކުރުމަށް ގިނަ މަސައްކަތްތަކެއް ކުރުމަށް ރޭވިފައިވާކަމަށް ވުޒާރާއިން ބުންޏެވެ. 

ތެލެސީމިއާ ކުދިންނަށް ދެވޭ ފަރުވާ އަދި ހިދުމަތުގެ ފެންވަރު ރަނގަޅުކުރުމަށް، މާލެ ސަރަހައްދުގައި ތެލަސީމިއާ ހޮސްޕިޓަލެއް އެޅުމަށް ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ. 

އަދި ތެލަސީމިއާ ކުދިންނަށާއި، ސެންޓަރުގެ ދަތިތައް ހައްލުކުރެއްވުމުގެ މަސައްކަތް ސީދާ ރައީސްގެ ބެއްލެވުމުގެ ދަށުން ކުރިއަށް ގެންދިއުމަށް އެމަނިކުފާނު އިއްޔެ ތެލަސީމިއާ ސެންޓަރަށް ވަޑައިގަތުމަށް ފަހު ނިންމެވި އެވެ. 

ހާއްސަ ސަމާލުކަމެއް ދީގެން ތެލަސީމިއާ ސެންޓަރުގެ މައްސަލަތައް ހައްލުކުރުމުގެ މަސައްކަތް ފަށާފައި ވަނީ، އެތަނުން ދެމުން އަންނަ ހިދުމަތްތައް ދޯހަޅިވެ، ގިނަ ބަޔަކު ނުރުހުން ފާޅުކޮށް މުޒާހަރާ ކުރުމާ ގުޅިގެންނެވެ. 

ރައީސް ވަނީ އިއްުޔެ އެ ސެންޓަރަށް ވަޑައިގެން ހާލަތު ބައްލަވައި މައްސަލަތައް ހައްލުކޮށްދެއްވާނެކަމުގެ ޔަގީންކަން ދެއްވާފަ އެވެ.