މިދިޔަ ވެރިކަމުގައި ސަރުކާރުން ފޮރުވަން އުޅުނު މައުލޫމާތުތައް ތިލަކުރުމުގައި ހަރަކާތްތެރި ނޫސްވެރިޔަކަށް އުޅުއްވި އަހުމަދު އަޒާނެވެ. މަޖިލީހުގެ ހިތަދޫ މެދު ދާއިރާގެ މެންބަރަކަށް، ޕީއެންސީގެ ޓިކެޓުގައި އަޒާން އިންތިހާބުވީ އޭނާއަށް ވެސް އޮތް މަގުބޫލުކަން ބޮޑުވުމުންނެވެ. އޭގެ ކުރިން އެއީ އެމްޑީޕީން ފަތަހަކޮށްފައިވާ ދާއިރާއެކެވެ.

އަނެއްކާ ވެސް ސިޔާސީ މަސްރަހުގައި އަޒާން މާ ބޮޑަކަށް ފާހަގަވެގެން މި އުޅެނީ ޕީއެންސީގެ ޕާލިމެންޓްރީ ގްރޫޕާ ދެކޮޅަށް ދެ ފަހަރަކު މަޖިލީހުގައި އަމަލު ކުރެއްވުމުންނެވެ.

ފުރަތަމަ ސުޕްރީމް ކޯޓުގެ ބެންޗު ކުޑަކުރަން ހުށަހެޅި ބިލަށް ވޯޓު ނުދެއްވައި ތަޅުމުން ބޭރަށް ނުކުމެވަޑައިގަތީ އެވެ. މަޖިލީހުގެ ބާރުގަދަ ދެ ކޮމިޓީއަކުން އޭނާ ބޭރު ވެސް ކޮށްފައިވަނިކޮށް މިއަދު އޭގެ ދެވަނަ ކަންތައް ހިންގީ އެވެ.

އައްޑޫގައި ކަރަންޓު ކެނޑުން ހައްލުނުވާތީ އެމްޑީޕީގެ ޕާލިމެންޓްރީ ގްރޫޕުގެ ލީޑަރު އިބްރާހީމް ނާޒިލް ހުށަހެޅުއްވި ކުއްލި މައްސަލައަށް ބަހުސްކުރައްވަން އަޒާން ތާއީދުކުރެއްވި އެވެ. ޕީއެންސީ މެންބަރުންގެ ވޯޓުން ކުއްލި މައްސަލަ ބޭރު ވެސް ކޮށްފި އެވެ.

------

ކައިރިކައިރީގައި ދެ ފަހަރު މަތިން ޕީއެންސީގެ ޕާލިމެންޓްރީ ގްރޫޕާ ދެކޮޅު ހެއްދެވުމުން ޕާޓީއާ މެދު ހިތްހަމަޖެހިވަޑައިނުގަންނަވާނީތޯ ސުވާލު އުފެދެ އެވެ. އަޒާން ހުންނެވި ގޮތަކާ މެދު ސޯޝަލް މީޑިއާގައި ވެސް އެބަ ސުވާލު އުފައްދަ އެވެ.

އަޒާންއާ އެ ސުވާލުތައް ކޮށްލީމެވެ. 'ކުރިއަށް މީޑިއާ'އަށް ދެއްވި ކުރު އިންޓަވިއުގައި އަޒާން ދެއްވި ޔަގީން ކަމަކީ ސަރުކާރާ ދެކޮޅު ނޫން ކަމެވެ.

-------

އަޒާން އަދި ހުންނެވީ ވިލު ފެހިކަން ގަދަ ޓައީގަ އެވެ. ރީނދޫ ޓައިއެއް އަޅަން އުޅޭހެން ހީވާ ކަހަލަ އެވެ. ދިވެހިރާއްޖޭގެ ސިޔާސީ މަސްރަހަކީ ކޮންމެ ގޮތަކަށް ވެސް އެނބުރިދާނެ މަސްރަހެކެވެ. ގައިމު ވެސް އަޒާނަކީ މި ސިޔާސީ ހޮޅުއަށީގައި  ވަރަށް ވާހަކަ ދެކެވޭ ސަހުޝަކަށް ވެއްޖެ އެވެ.