ޓީނޭޖު ވެޓަރެންސް ބަލިކޮށް ޓީސީ ސްޕޯޓްސް ކުލަބުން ގަދަ 16 އަށް ދަތުރުކޮށްފިއެވެ.

ރޭ ފެށި އީދު ބައިބަލާ ޗެލެންޖުގައި ޓީސީއިން ޓީނޭޖު ވެޓަރެންސްގެ މައްޗަށް ކުރި ހޯދީ ސީދާ 2 ގޭމުންނެވެ.

ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު އެ މެޗުގެ ފުރަތަމަ ގޭމުގައި އެތެރެއިން ކުޅުނީ ޓީނޭޖް ވެޓަރަންސްއިންނެވެ. ބޭރުން ވަނީ ޓީސީއިންނެވެ. އެ ގޭމު 6-7 ގެ ނަތީޖާއަކުން ކާމިޔާބުކުރީ ޓީސީއިންނެވެ.

ދެވަނަ ގޭމުގައި ޓީސީއިން އެތެރެއަަށް ވަދެ ވަނީ މޮޅު ކުޅުމެއް ދައްކައިފައެވެ. އެ ޓީމުން ވަނީ ބޭރުން އެރި ޓީނޭޖު ވެޓަރެންސްގެ 17 ކުޅުންތެރިން ނުބައިކޮށްފައެވެ. އެ ގޭމުގައި ޓީނޭޖު ވެޓަރެންސަށް ނުބަައިކުރެވުނީ ޓީސީގެ ތިން ކުޅުންތެރިންނެވެ.

އެ މެޗުން މޮޅުވެ ޓީސީއިން ގަދަ 16 އަށް ދަތުރުކުރިއިރު، ޓީނޭޖު ވެޓަރަންސް ވަނީ މުބާރާތުން ކަޓައިފައެއެވެ.

އީދު ބައިބަލާ ޗެލެންޖަކީ ކޮންމެ އަހަރެއްގެ ވެސް ފިތުރު އީދާ ދިމާކޮށް ބައިބަލާ އެސޯސިއޭޝަނުން އިންތިޒާމުކޮށްގެން ބާއްވާ މުބާރާތެކެވެ.