އަހަރުގެ ތިންވަނައަށް އެންމެ މޮޅު ޒުވާން ފިރިހެން ކުޅުންތެރިއަކަށް ރައީސް ޑރ. މުހައްމަދު މުއިއްޒުގެ ދަރިކަލުން އުމެއިރު މުހައްމަދު މުއިއްޒު ހޮވިއްޖެ އެވެ.

ރޭ ބޭއްވި ކުޅިވަރު އެވޯޑްސްގައި އުމެއިރުއަށް ލިބުނީ 2024 ވަނަ އަހަރުގެ ތިންވަނައަށް އެންމެ މޮޅު ޒުވާން ފިރިހެން ކުޅުންތެރިޔާގެ އެވޯޑެވެ. އެ އެވޯޑަށް އޭނާ ނޮމިނޭޓް ކޮށްފައިވަނީ ޓޭބަލް ޓެނިސް (ޓީޓީ) އެސޯސިއޭޝަނުންނެވެ.

2024 ވަނަ އަހަރު ބޭއްވި ގައުމީ ޓޭބަލް ޓެނިސް މުބާރާތުގައި ދެ ރަން މެޑެލް އާއި ހަތަރު ރިހި މެޑެލް އަދި އެއް ބްރޯންޒް މެޑެލް އުމެއިރު ހޯދިއިރު އެ މުބާރާތުން އުމެއިރު ރަން މެޑެލް ހޯދީ 15 އަހަރުން ދަށުގެ ފިރިހެން ސިންގަލްސް އިންނާއި 17 އަހަރުގެ ފިރިހެން ޑަބަލްސްއިންނެވެ.

ރޭގެ އެވޯޑްސްގައި 2024 ވަނަ އަހަރުގެ އެންމެ މޮޅު އަންހެން އެތުލީޓްގެ އެވޯޑް ހޯދީ ފާތިމަތު ދީމާ އަލީ އެވެ. އެންމެ މޮޅު ފިރިހެން އެތުލީޓްގެ އެވޯޑް ހޯދި މޫސާ މުންސިފް އަހްމަދު އެވެ.