ދައުލަތުގެ މުވައްޒަފުން ސަސްޕެންޑުކުރާއިރު، އެ މުއްދަތުގައި މުސާރަ ނުހިގާ ގޮތަށް އުސޫލު ބަދަލުކޮށްފައިވާ ކަމަށް ރައީސް މުހައްމަދު މުއިއްޒު ވިދާޅުވެއްޖެއެވެ.

ދައުލަތުގެ އިސް މަގާމުތަކުގައި ތިބޭ މުވައްޒަފުން އެކި މައްސަލަތަކާ ގުޅިގެން ސަސްޕެންޑް ކުރާއިރު، މުސާރަ ނުލިބޭ ގޮތަށް އުސޫލު ބަދަލުކޮށްފިއެވެ. މިކަން ހާމަކުރެއްވީ ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައެވެ.

މީގެ އިތުރުން، ސިޔާސީ މަގާމުތަކަށް ކުރެވޭ ޚަރަދާއި، އައްޔަންކުރެވޭނެ ސިޔާސީ މަގާމުތަކުގެ އަދަދު ކަނޑައެޅުމަށް ގާނޫނެއް އެކުލަވާލުމަށް ނިންމާފައިވާ ކަމަށް ވެސް ރައީސް ހާމަކުރެއްވިއެވެ. މި ގާނޫނުގެ ދަށުން މި ކަންކަން ކަނޑައަޅާނީ ރައްޔިތުންގެ މަޖިލީހުންނެވެ.

މި ބަދަލަކީ ދައުލަތުގެ ޚަރަދުތައް ކުޑަކުރުމަށް އަޅަމުންދާ ފިޔަވަޅުތަކުގެ ތެރެއިން އެޅުނު ފިޔަވަޅެއް ކަމަށް ބެލެވެއެވެ. މީގެ ކުރިން ސަސްޕެންޑް ކުރެވޭ މުވައްޒަފުންނަށް ގިނަ ދުވަސްތަކެއް ވަންދެން މުސާރަ ދެމުން ދިޔުމަކީ ދައުލަތުގެ މާލިއްޔަތަށް ބުރަވާ ކަމެއްގެ ގޮތުގައި ފާހަގަކުރެވިފައިވެއެވެ.