ރާއްޖެއިން މި އަހަރު ދައްކަން ޖެހޭ އެންމެ ބޮޑު ބޭރުގެ ދަރަނި 500 މިލިއަން ޑޮލަރުގެ ސްކޫކް ވަގުތުން ވަގުތަށް ދައްކަން ޖެހިއްޖެ ނަމަވެސް އެ ފައިސާ ރާއްޖެއަށް މިއަދު ވެސް ދެއްކޭނޭ ކަމުގެ ޔަގީންކަން އެބައޮތް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ 8 އެޕްރީލް ވަނަ ދުވަހު ރާއްޖެއިން ސްކޫކަށް ދައްކަން ޖެހޭ ފައިސާ އެކީ ދައްކާ ހަލާސްކުރާނެ ކަމަށެވެ. 

"އެ ތާރީހުގައި ފައިސާ ދައްކަން ރައްކާކޮށްފައި އެބަހުރި 650 މިލިއަން ޑޮލަރު. އެހެންވީމާ، 500 މިލިއަން ޑޮލަރުގެ ސްކޫކް ދައްކާފައި 150 މިލިއަން ޑޮލަރަށް ވުރެ ގިނައިން ހުންނާނެ،" ރައީސް މުއިއްޒު ވިދާޅުވި އެވެ. 

އެމަނިކުފާނު ވިދާޅުވީ މިއަހަރަށް ބޭނުންވާ އިތުރު ފައިސާ ހޯދުމަށްވެސް ގިނަ މަސައްކަތްތަކެއް ކުރެވެމުންދާ ކަމަށާއި، ދަރަނި ދެއްކުމުގައި އެއްވެސް ކަންބޮޑުވުމެއް ނެތް ކަމަށެވެ.

"ވަރަށް ކާމިޔާބު މުޢާމަލާތްތައް ކުރިއަށްދޭ، ނެގޯސިއޭޝަންސް ކޮންކުލޫޑުވާ ހިސާބަށް ގޮސްފައިވަނީ، ދަރަނި ދެއްކުމަށް އެއްވެސް ކަންބޮޑުވުމެއް ނެތް، އިގްތިސާދު މެނޭޖްކުރަމުން މި ދަނީ ބޭރަށް ދައްކަން ޖެހޭ ދަރަނި އާއި އެތެރޭގެ ދަރަނި ދެއްކޭގޮތަށް" ރައީސް ވިދާޅުވިއެވެ.

ނޫސްވެރިންގެ ބައްދަލުވުމުގައި ރައީސް ވިދާޅުވީ ރާއްޖޭގެ ގްރޮސް ރިޒާވްގައި 1.7 ބިލިޔަން އެމެރިކާ ޑޮލަރު އެބަހުރި، މިއީ ރާއްޖޭގެ ތާރީހުގައި ދުވަހަކުވެސް ގްރޮސް ރިޒާވް މައްޗަށް ނުދާ މިންވަރެއް ކަމަށެވެ.