އެޕްލިކޭޝަން ޑެޑްލައިނެއް ނުބާއްވައި ސްޓޫޑެންޓް ލޯނަށް އެދުމުގެ ފުރުޞަތު މުޅި އަހަރަށް ހުޅުވާލާގޮތަށް ނިންމާފައިވާކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.

ރައީސް އޮފީހުގައި ބޭއްވި ޕްރެސްގައި ހައިދަރު ވިދާޅުވީ 2026 ގެ ލޯނު ސްކީމަށް އެދުމުގެ ފުރުސަތު ހުޅުވާލުމަށްޓަކައި ޕޯޓަލް ތައްޔާރުކުރުމާއި އުސޫލު އެކުލަވާލުމުގެ މަސައްކަތް ކުރަމުންދާ ކަމަށާއި ސްކީމުގެ ކަންކަން ހަރުދަނާކުރުމަށްޓަކާ ކުރާ މަސައްކަތުގެ ތެރެއިން އެޕްލިކޭޝަން ޑެޑްލައިނެއް ނުބާއްވައި ލޯނަށް އެދުމުގެ ފުރުސަތު މުޅި އަހަރަށް ހުޅުވާލާގޮތަށް ހަމަޖައްސާފައިވާކަމަށެވެ. 

"މިހާތަނަށް ދަރިވަރުން ލޯނު ހޯދަން އެދި ހުށަހަޅަން ވަކި މުއްދަތެއް ކަނޑައެޅިފައި އޮތުމުން، އެ މުއްދަތުގައި ލޯނަށް އެދި ހުށަހެޅުން ބައެއް ދަރިވަރުންނަށް ދަތިވޭ... މިބަދަލު ގެނައުމުގެ ސަބަބުން އަޅުގަނޑުމެން އުންމީދުކުރަނީ އެހެން ނުވާނެކަމަށް. އަދި ލޯނަށް އެދި ހުށަހެޅުން ދަރިވަރުންނަށް ވަރަށް ބޮޑުތަން ފަސޭހަވެގެންވެސް ދާނެކަމަށް" މިނިސްޓަރު ވިދާޅުވި އެވެ.

ހައިދަރު ވިދާޅުވީ، ސްޓޫޑެންޓް ލޯނަށް އެދި ހުށަހެޅުމުގެ ފުރުސަތު މި ފެށޭ ބަންދު ދުވަސްތަކަށްފަހު ހުޅުވާލެވޭނެ ކަމަށެވެ.