ސްޓެލްކޯއިން ދެ ދާއިރާއަކުން ސްކޮލާޝިޕް ދިނުމަށް ނިންމައި، އެކަމަށް ހުޅުވާލައިފިއެވެ.

ސްޓެލްކޯއިން އިއްޔެ ގެޒެޓުކުރި އިއުލާނުގައިވާ ގޮތުން  އިނގިރޭސިވިލާތުގައި ބެޗްލާސް ޑިގްރީ ހާސިލުކުރުމަށް ދެ ދާއިރާއަކުން ތިން ފުރުސަތެއް ވަނީ ހުޅުވައިލައިފައެވެ. އެއީ އިލެކްޓްރިކަލް އެންޑް އިލެކްޓްރޯނިކް އިންޖިނިއަރިން ދާއިރާއިން ޖާގައަކާއި މެކޭނިކަލް އިންޖިނިއަރިން ދާއިރާއިން ދެ ޖާގައެވެ. 

ސްޓެލްކޯއިން ބުނެފައިވަނީ މި ޖާގަތަކަށް އެދެވޭނީ ހިސާބާ ފިސިކްސް ނުވަތަ ކެމިސްޓްރީ އާއި ކޮމްޕިއުޓަރު ސައިންސް ހިމެނޭހެން އޭލެވެލްގައި ދެ "އޭ ސްޓާ" އަދި "އޭ" ރިޕޯޓެއް ހޯދައިފައިވާ ދަރިވަރުންނަށް ނުވަތަ އެއާ އެއްވަރުގެ އައިބީ ސެޓްފިކޭޝަނެއް އޮތް ދަރިވަރުންނަށް ކަމަށެވެ. 

ސްކޮލާޝިޕަށް ހޮވޭ ދަރިވަރުންނަށް ކޯސްފީއާ ސްޓައިޕަންޑާއި ވިސާ ފީއާ ދެކޮޅު ޓިކެޓްގެ އިތުރުން ބުކް އެލަވަންސް އަދި އެސްޓާބްލިޝްމަންޓް އެލަވަންސްވެސް ލިބޭނެކަމަށް ސްޓެލްކޯއިން ބުނެފައިވެއެވެ. އަދި ކޯސް ފެށުމުގެ ކުރިން އެ ކުންފުނީގައި އިންޓާންޝިޕެއް ހަދަންޖެހޭ ކަމަށްވެސް އެ ކުންފުނިން ބުނެފައިވެއެވެ. 

މީގެ އިތުރުން ސްޓެލްކޯއިން ބުނެފައި ވަނީ މި ކޯސްތައް ފުރިހަމަކުރާ ދަރިވަރުން ކޯސް ނިންމުމަށްފަހު ހިދުމަތް ކުރަންޖެހޭނީ ސްޓެލްކޯއަށް ކަމަށެވެ. އެ ކޯސްތަކަށް ފުރުސަތު ހުޅުވާލާފައިވަނީ އަންނަ އޭޕްރީލް މަހުގެ ނިޔަލަށެވެ.