ސްޓެލްކޯގެ ޕްރޮކިއުމަންޓް ޑިޕާޓްމަންޓްގެ ޖެނެރަލް މެނޭޖަރު އަޒްހަދު ރަމީޒު ވެސް އެ މަގާމުން ދުރުކޮށްފި އެވެ.

އޭނާ އެ މަގާމުން ދުރުކޮށްފައި ވަނީ އެ ކުންފުނީގެ އެމްޑީގެ މަގާމުން ވަކިކުރި އަހުމަދު ޝަމާހު ވަކިކުރުމުން ވަގުތީ ގޮތުން އެ ކުންފުނި ހިންގުން ޑެޕިއުޓީ މެނޭޖިން ޑިރެކްޓަރު، ޑރ. އަލީ އަޒްވާރާ ހަވާލުކޮށްފައި ވަނިކޮށެވެ.

ޝަމާހު ވަކިކޮށްފައިވާއިރު ސޯޝަލް މީޑިއާގައި އޭނާ ވާހަކަދައްކާ ކަމަށް ބުނާ އޯޑިއޯއެއް ލީކުވެފަ އެވެ.

އެ އޯޑިއޯގައި ޝަމާހު ބުނަނީ ކުންފުނީގެ އެތެރޭގައި ކުރަން އުޅުނު ކަންތައްތައް އެނގޭނީ ކުންފުނީގެ ޕްރޮކިއުމަންޓް ޑިޕާޓްމަންޓްގެ ޖެނެރަލް މެނޭޖަރު އަޒްހަދާއި އިތުރު އެހެން މީހަކަށް ކަމަށެވެ.

ނަމަވެސް އެއީ ޝަމާހު ކަމެއް ޔަގީނެއް ނޫނެވެ.

ޝަމާހު ސްޓެލްކޯގެ އެމްޑީގެ މަގާމުން ވަކިކުރި ސަބަބެއް އަދި މިހާތަނަށް ޕީސީބިން ހާމަކޮށްފައެއް ނުވެ އެވެ. މި ސަރުކާރުގައި ޝަމާހުއަށް ފުރަތަމަ އަދާކުރީ މިފްކޯގެ ސީއީއޯ ކަމުގެ މަގާމެވެ.