ސަރުކާރުގައި ތިބި ސިޔާސީ މުވައްޒަފުން ޕީއެންސީގެ ކެންޑިޑޭޓުންނަށް ކެމްޕެއިން ނުކުރާ ނަމަ އިސްތިއުފާ ދިނުމަށް މަޑަވެލި ދާއިރާގެ މަޖިލިސް މެންބަރު މުހައްމަދު ޝަމީޒު ގޮވާލައްވައިފި އެވެ. 

ޝަމީޒު ފޭސްބުކް ޕޯސްޓެއްގައި ލިއުއްވީ ރައީސް މުހައްމަދު މުއިއްޒު އައްޔަންކުރައްވާފައިވާ ސިޔާސީ މުވައްޒަފުން ޕީއެންސީގެ ކެންޑިޑޭޓުންނަށް ކެމްޕެއިން ނުކުރާ ނަމަ މަގާމުތަކަށް އެކަށީގެންނުވާ ކަމަށެވެ. 

"ރައީސް މަގާމުތަކަށް އައްޔަންކުރައްވާފައިވާ މަޑަވެލި ދާއިރާއަށް ނިސްބަތްވާ ސިޔާސީ މީހުންގެ ފަރާތުން މަޑަވެލި ދާއިރާގެ ޕީއެންސީގެ ކެންޑިޑޭޓުންނަށް ކެމްޕެއިން ނުކުރެވޭ ނަމަ މަގާމުތަކަށް އެކަށީގެން ނުވޭ،" ޝަމީޒު ލިއުއްވާފައިވާ އެވެ.

ކެމްޕެއިން ނުކުރާ ސިޔާސީ މުވައްޒަފުންނަށް އޮތީ ދެ ގޮތް ކަމަށް އޭނާ ވިދާޅުވި އެވެ. އެއީ ކެމްޕެއިން ކޮށްދީގެން މަގާމުގައި ދެމިހުރުން ނުވަތަ އިސްތިއުފާ ދިނުން ކަމަށް ވިދާޅުވި އެވެ.