ޝެއިޚް އިބްރާހިމް ފަރީދުގެ ހަނދާނުގައި ހުޅުމާލޭގައި މިސްކިތެއް ބިނާކުރުމަށް ނިންމައި އެތަނަށް އެހީ ދިނުމަށް ޚިދުމަތް ޖަމިއްޔާއިން ފުރުސަތު ހުޅުވާލައިފި އެވެ.

އެ ޖަމިއްޔާއިން ބުނީ މިސްކިތް އަޅާނީ ހުޅުމާލެ ތިން ވަނަ ފިޔަވަހީގައި ކަަމަށެވެ. އެއީ، 2،500 މީހުންނަށް ނަމާދު ކުރެވޭހެން އިމާރާތް ކުރާ ދެ ބުރީގެ މިސްކިތެއް ކަމަށް ޖަމިއްޔާއިން ބުންޏެވެ.

ޖަމިއްޔާއިން ބުނީ، މިސްކިތުގެ އެތެރެ ފަރުމާކުރާނީ މަލްޓި ޕާޕަސް ހޯލެއް ހިމެނޭ ގޮތަށް ދީނީ އެކި ހަރަކާތްތައް ކުރިއަށް ގެންދެވޭ ގޮތަށް ކަމަށާއި، އޭގެ ތެރޭގައި ގުރުއާން ކުލާސްތަކާއި ހިފްޒު ކްލާސްތަކާއި ދީނީ ސެމިނާތަކާއި މުހިންމު ބައްދަލުވުންތަކާއި ގުރުއާން މުބާރާތްތަކާއި މަދަޙަ މުބާރާތްތައް ބޭއްވޭނެ ފަދަ ފުރިހަމަ އިންތިޒާމުތައް ހިމެނޭ ކަމަށެވެ.

މަޝްރޫއުގެ އަމަލީ މަސައްކަތް ފެށުމަށްޓަކައި އިސްލާމިކް މިނިސްޓްރީއާ އެކު، އެ ޖަމިއްޔާއިން އެމްއޯޔޫގައި ސޮއިކުރުމަށް ގާތްވެފައިވާ ކަމަށް ޖަމިއްޔާއިން ބުންޏެވެ. އެހީތެރިވުމަށް ފައިސާ ޓްރާންސްފާ ކުރަން ޖެހެނީ (އެކައުންޓް ނަމްބަރު: 7770000141496) އަށެވެ. 

ފަރީދުގެ ހަނދާނުގައި ބަންގްލަދޭޝްގައި މިސްކިތެއް އެޅުމަށް ނިންމާފައިވާއިރު އެ މިސްކިތް އަޅަން 760،000 ރުފިޔާ ވަނީ ހަމަވެފައެވެ.