ކުރީގެ ކޮންޓްރޯލާ ޖެނެރަލް އޮފް އިމިގްރޭޝަންގެ މުހައްމަދު ޝަމްއާން ވަހީދަށް ކުރަނީ 500،000 އަށް ވުރެ ގިނަ ރުފިޔާ ނެގުމަށް ފަހުގައި ބިދޭސީއަކު ދޫކޮށްލިކަމުގެ ތުހުމަތު ކަމަށް ފުލުހުން ބުނެފިއެވެ.

ފުލުހުން ދެންމެ ނެރުނު ބަޔާނެއްގައި ބުނީ، ގަވައިދާ ހިލާފަށް އުޅޭ ބިދޭސީން ހޯދުމަށް ހަރަކާތްތެރިވާ އިމިގްރޭޝަންގެ ޓާސްކް ފޯހުގައި މަސައްކަތްކުރާ މުވައްޒަފުންނޫން އެހެން މުވައްޒަފުންތަކެއް މަގާމުގެ ނުފޫޒު ބޭނުންކޮށްގެން ބިދޭސީ މަސައްކަތްތެރީން ދިރިއުޅޭ ގެއެއް ބަލައި ފާސްކޮށް، ގިނަ އަދަދެއްގެ ފައިސާއާއެކު ބިދޭސީންތަކެއް އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށެވެ.

ފުލުހުން ބުނީ، އޭގެ އެއް ދުވަސް ފަހުން ޝަމްއާންގެ އޯޑަރަށް އެތަނުން 530،000 ރުފިޔާއާއެކު އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއެއް ދަންވަރުގެ ވަގުތެއްގައި ދޫކޮށްލާފައިވާކަން ތަހުގީގަށް އެނގިފައިވާ ކަމަށެވެ. 

"އިސްވެ ދެންނެވުނު ގެ ބަލައިފާސްކުރުމުގައި ހަރަކާތްތެރިވި އިމިގްރޭޝަންގެ މުވައްޒަފުން ޑިޓެންޝަނުން ދޫކޮށްލި ބިދޭސީ މީހާއާ މަގުމަތިން ބައްދަލުކޮށް، އޭނާގެ އަތުގައި ހުރި ފައިސާތައް ހޯދައި، އެ ފައިސާތައް ހިފައިގެން 1 މާރިޗު 2025 ވަނަ ދުވަހާ ހަމައަށް ކޮންޓްރޯލާ ޖެނެރަލް އޮފް އިމިގްރޭޝަންގެ މަގާމު އަދާކުރަމުންދިޔަ މުހައްމަދު ޝަމްއާން ވަހީދު ދިރިއުޅޭ އިމާރާތަށް ވަދެފައިވާކަންވެސް ތަހުގީގަށް އެނގިފައިވެއެވެ" ފުލުހުން ބުންޏެވެ.

ފުލުހުން ބުނީ، ޝަމްއާން ދިރިއުޅޭ ގެ ބަލައިފާސްކޮށް ގިނަ އަދަދެއްގެ އިލެކްޓްރޯނިކް ސާމާނާއި ފައިސާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. 

އިތުބާރު ހިފޭ މަސްދަރުތަކުން "ކުރިއަށް މީޑިއާ" އަށް ކަށަވަރުކޮށްދިން ގޮތުގައި ކޯޓު އަމުރެއްގެ ދަށުން ފުލުހުން  ޝަމްއާން ދިރިއުޅުއްވާ މ. ސިލްވާލައިން ބަލައިފާސްކޮށްފައިވަނީ ރޭ ދަންވަރުއެވެ.

އިމިގްރޭޝަން ކޮންޓްރޯލަރުގެ މަގާމަށް އައްޔަންކުރި ޝަމްއާން ރޭ މަގާމުން ވަކިކޮށް، އެ މަގާމަށް އައްޔަންކުރީ ކުރީގެ ޕޮލިސް ކޮމިޝަނަރު އަހުމަދު ފަސީހެވެ. އޭނާ އެ މަގާމަށް އައްޔަނުކުރެއްވީ ސްޓޭޓް މިނިސްޓަރުގެ ފެންވަރުގައެވެ،