މަގާމުގެ ނުފޫޒު ބޭނުންކޮށްގެން ބިދޭސީއެއްގެ އަތުން ބައި މިލިއަނަށްވުރެ ގިނަ ރުފިޔާ ހޯދި މައްސަލާގައި ހައްޔަރުކުރި ކުރީގެ އިމިގްރޭޝަން ކޮންޓްރޯލާ މުހައްމަދު ޝަމްއާން ވަހީދުގެ ބަންދަށް 15 ދުވަސް، މިއަދު ކްރިމިނަލް ކޯޓުން ޖަހައިފި އެވެ. 

ބިދޭސީއަކު ދޫކޮށްލަން ރިޝްވަތު ނެންގެވި ކަމުގެ ތުހުމަތުގައި ޝަމްއާން މަގާމުން ވަކިކުރީ ބުރާސްފަތި ދުވަހުގެ ރޭގެ ވަގުތެއްގަ އެވެ. ބިދޭސީއަކު އިމިގްރޭޝަންގެ ބެލުމުގެ ދަށަށް ގެނައުމަށް ފަހު ރިޝްވަތު ނަގައިގެން ދޫކޮށްލި މައްސަލައެއް ބަލަމުންދާ ކަން ހާމަކޮށް، ޝަމްއާން ވަކިކުރި ވަގުތުކޮޅުގައި ފުލުހުން ވަނީ ބަޔާނެއް ވެސް ނެރެފަ އެވެ. އެ ބަޔާނަކު ޝަމްއާނަށް ކުރާ ތުހުމަތު ލިޔެފައެއް ނެތެވެ.

ފުލުހުން މިރޭ ނެރުނު ބަޔާނުގައި ބުނީ ބިދޭސީން ދިރިއުޅޭ ތަނެއް ބަލައިފާސްކުރީ އިމިގްރޭޝަންގެ އޮފިސަރުންތަކެއް މަގާމުގެ ބޭނުން ނަހަމަކޮށް ހިފައިގެނެވެ. އެ އޮފިސަރުންނަކީ ގަވާއިދާ ހިލާފަށް އުޅޭ ބިދޭސީން ހޯދައި ޑިޓެއިން ކުރުމުގެ ޒިންމާ ހަވާލުކުރި ޓާސްކް ފޯހާއި ރިސްކް މެނޭޖުމަންޓްގައި ނުވެސް ހިމެނޭ މުވައްޒަފުންތަކެއް ކަމަށް ފުލުހުން ބުންޏެވެ.

"އިސްވެ ދެންނެވުނު ގެ ބަލައިފާސްކުރުމުގައި ހަރަކާތްތެރިވި އިމިގްރޭޝަންގެ މުވައްޒަފުން ޑިޓެންޝަނުން ދޫކޮށްލި ބިދޭސީ މީހާއާ މަގުމަތިން ބައްދަލުކޮށް، އޭނާގެ އަތުގައި ހުރި ފައިސާތައް ހޯދައި، އެ ފައިސާތައް ހިފައިގެން 1 މާރިޗު 2025 ވަނަ ދުވަހާ ހަމައަށް ކޮންޓްރޯލާ ޖެނެރަލް އޮފް އިމިގްރޭޝަންގެ މަގާމު އަދާކުރަމުންދިޔަ މުހައްމަދު ޝަމްއާން ވަހީދު ދިރިއުޅޭ އިމާރާތަށް ވަދެފައިވާކަންވެސް ތަހުގީގަށް އެނގިފައިވެއެވެ" ފުލުހުން ބުންޏެވެ.