ކޮންޓްރޯލާ ޖެނެރަލް އޮފް އިމިގްރޭޝަންގެ މަގާމުން ރޭ ވަކިކުރި، މުހައްމަދު ޝަމްއާން ވަހީދު ދިރިއުޅުއްވާގެ ފުލުހުން ބަލައިފާސްކޮށް ފައިސާތަކެއް ގެންގޮސްފައިވާކަން އެނގިއްޖެއެވެ.

އިތުބާރު ހިފޭ މަސްދަރުތަކުން "ކުރިއަށް މީޑިއާ" އަށް ކަށަވަރުކޮށްދިން ގޮތުގައި ކޯޓު އަމުރެއްގެ ދަށުން ފުލުހުން ޝަމްއާން ދިރިއުޅުއްވާ މ. ސިލްވާލައިން ބަލައިފާސްކޮށްފައިވަނީ ރޭ ދަންވަރުއެވެ.

އެ ގެ ފާސްކޮށް، ފުލުހުން ވަނީ ޝައްމާންގެ ލެޕްޓޮޕާއި ފައިސާތަކެއް ގެންގޮސްފައެވެ. ނަމަވެސް އެއީ ކިހާ ފައިސާއެއްކަން ސާފެއް ނޫނެވެ. 

ޝަމްއާން ދިރިއުޅުއްވާ ގެ ބަލައިފާސްކުރިއިރު، އިމިގްރޭޝަނުގެ ބައެއް މުވައްޒަފުން ބިދޭސީ މަސައްކަތްތެރިންގެ އަތުން ނާޖާއިޒު ފައިދާ ހޯދާ ކަމަށް ތުހުމަތު ކުރެވޭ މައްސަލަތަކެއް ބަލާ ކަމަށް ފުލުހުން ރޭ ދަންވަރު ނެރުނު ބަޔާނެއްގައި ވަނީ ބުނެފަ އެވެ. އެ މައްސަލައިގައި ތިން މީހަކު ހައްޔަރުކޮށްފައިވާ ކަމަށްވެސް ފުލުހުން ބުނެފައިވެއެވެ. 

އިމިގްރޭޝަން ކޮންޓްރޯލަރުގެ މަގާމަށް އައްޔަންކުރި ޝަމްއާން ރޭ މަގާމުން ވަކިކޮށް، އެ މަގާމަށް އައްޔަންކުރީ ކުރީގެ ޕޮލިސް ކޮމިޝަނަރު އަހުމަދު ފަސީހެވެ. އޭނާ އެ މަގާމަށް އައްޔަނުކުރެއްވީ ސްޓޭޓް މިނިސްޓަރުގެ ފެންވަރުގައެވެ،