މަގާމުގެ ނުފޫޒު ބޭނުންކޮށްގެން ބިދޭސީން އަތުން ނާޖާއިޒު މަންފާތަކެއް ހޯދި ކަމަށް ބުނާ މައްސަލައިގައި ހައްޔަރުކޮށް ބަންދުކުރި ކުރީގެ އިމިގްރޭޝަން ކޮންޓްރޯލަރު 
މުހައްމަދު ޝަމްއާން ވަހީދު ބަންދުކުރި މައްސަލަ ހައި ކޯޓަށް ހުށަހަޅައިފި އެވެ.

ޝަމްއާން މަގާމުން ވަކިކޮށް އޭނާ ހައްޔަރުކުރީ މިދިޔަ ހުކުރު ދުވަހުގެ ރޭއެވެ. ހޮނިހިރު ދުވަހު ޝަމްއާންގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހައިފައެވެ. 

ހައި ކޯޓުގެ ރަޖިސްޓްރީން ދައްކާ ގޮތުގައި، ޝަމްއާން ބަންދުކުރަން ނެރުނު އަމުރު އޭނާގެ ފަރާތުން އެ ކޯޓުގައި އިއްޔެ ވަނީ އިސްތިއުނާފުކޮށްފައެވެ. ނަމަވެސް އެ މައްސަލަ ބަލައިގުމާމެދު އެ ކޯޓުން އަދި ވަކި ގޮތެއް ނުނިންމައެވެ. 

ފުލުހުން ޝަމްއާނަށް ތުހުމަތުކުރަނީ އިމިގްރޭޝަންގެ ޑިޓެންޝަނަށް ގެނައި، ބިދޭސީއެއް އޭނާގެ އޯޑަރަށް ދޫކޮށްލައި، އޭނާގެ އަތުން 530،000 ރުފިޔާ ހޯދުމެވެ. އެ މައްސަލައިގައި ކޯޓު އަމުރެއްގެ ދަށުން ޝަމްއާން ދިރިއުޅޭ ގެ ބަލައިފާސްކޮށް ގިނަ އަދަދެއްގެ ފައިސާއާއި އިލެކްޓްރޯނިކް ސާމާނުތަކެއް ގެންގޮސްފައިވެއެވެ. 

މި މައްސަލާގައި ޝަމްއާންގެ އަނބިކަނބަލުން ހިދްފާ ފާއިޒްގެ ފޯނުވެސް ފުލުހުން ވަނީ ހިފަހައްޓައިފަ އެވެ.