ހުޅުމާލެ ނިރޮޅުމަގު އެލް މޯބައިލް 3 ކައިރިން މަގު ހުރަސް ކޮށްފައި ދިޔަ ކުއްޖަކާއި އެ މަގުން ދުއްވާފައި ދިޔަ ސައިކަލެއް ޖެހި އެކްސިޑެންޓެއްގައި ކުއްޖާއަށް ބޮޑެތި އަނިޔާތަކެއް ވެފައިވާ ކަން ފުލުހުން މިއަދު ބުނެފި އެވެ. 

މި އެކްސިޑެންޓްގައި އަނިޔާވި ހައަހަރުގެ ކުއްޖާގެ ކަނާތްފަރާތު ތުންފަތް މަތިން ބައި އިންޗިއެއްހާ ތަން ފަޅައިގެން ގޮސްފައި ވާކަމަށް ފުލުހުން ބުންޏެވެ.

ފުލުހުންނަށް މި މައްސަލަ ހުށައަޅާފައިވަނީ މިދިޔަ ހުކުރު ދުވަހުގެ މެންދުރު 3:50 ހާކަށްއިރު ކަމަށްވެސް ފުލުހުން ބުންޏެވެ.

ފުލުހުންނަށް މައްސަލަ ހުށައެޅި ފަރާތުންވަނީ އެކްސިޑެންޓްގެ ސަބަބުން ކުއްޖާގެ ކަކޫ މަށައިގެންގޮސް ތުންފަތުގެ ކަނާތްފަރާތުގެ މަތިން ބައި އިންޗިއެއްހައިތަން ފަޅައިގެން ގޮސް އަނިޔާވެފައި ވާކަމަށާއި، އަދި އިތުރު ކުދި އަނިޔާތައް ވެސް ވެފައިވާކަމަށް ހުށައަޅާފައެވެ.

ފުލުހުން ކުރި ތަހުގީގުން މި އެކްސިޑެންޓް ހިނގި ސައިކަލު ދުއްވާފައިވަނީ އެ ކެޓެގަރީގެ އުޅަނދު ދުއްވުމުގެ ލައިސަންސް އޮންނަ ފަރާތެއް ކަން ވަނީ އެނގިފައެވެ.

މި މައްސަލަ އަދިވެސް ފުލުހުން ދަނީ އިތުރަށް ތަހުގީގު ކުރަމުން ކަމަށް ފުލުހުން ވިދާޅުވެފައިވެއެވެ.