އުބޭދުالله އަހްމަދު އާންމު ނަމުން ނަމަ (އުބޭ)، މިހާރު މިކަމުގެ ތެރޭގައި ގާތްގަނޑަކަށް 7 އަހަރު ވީ އެވެ. މިހާރު އެއީ ހަބޭސް ބޮޑުބެރު ގުރޫޕް އަދި ހަބޭސް ބޭންޑްގައި ލީޑް ވޯކަރލިސްޓެއްގެ އިތުރުން ލީޑް ގިޓަރިސްޓެވެ.

މިއުޒިކީ ދުނިޔެއަށް ރަނގަޅަށް ވެސް ވަދެފައި ހުރި ހުނަރުވެރި ޒުވާނެކެވެ.

އުބޭގެ މިއުޒިކް ހަޔާތުގެ އުސްއަލިތައް "ކުރިއަށް" މީޑިއާއަށް ދިން ކުރު އިންޓަވިއުގައި ހިއްސާކުރި އެވެ. 

"މޯލްޑިވިއަން އިންފްލައިޓް ސާވިސް" ގައި މުވައްޒަފެއްގެ ގޮތުގައި މަސައްކަތް ކުރަމުން ވެސް އުބޭއަކީ މިއުޒިކްގެ އިތުރުން ގްރެފިކް ޑިޒައިންގެ ހުނަރު ވެސް ކުރިއަރުވަމުންދާ މަސައްކަތްތެރިއެކެވެ. އާޓިސްޓެކެވެ.

ލަވައިގެ ތެރެއަށް ވަދެވިގެން އައިގޮތް ކިޔައިދެމުން އުބޭ ބުނި ގޮތުގައި އޭނާ ފުރަތަމަ އުޅުނީ ސަގާފީ ނެށުންތަކަށް ނަށާށެވެ.

މިހެން އުޅެނިކޮށް ދިމާވީ ހެއްވާ ކަމެކެވެ. އޭނާގެ އުފަން ރަށުގައި ބޭއްވި ޝޯއެކެވެ. ލަވައިގެ ފޯރި ގަދަ ވަގުތެއްގައި ލީޑް ވޯކަލިސްޓް ހުއްޓާލީ އެވެ. އެކަމަކު އެ ވަގުތު އުބޭ ދިޔައީ ލަވަ ކިޔުމުގައި ކުރިއަށެވެ. ލަވަކިޔުމުގެ ތެރެއަށް އޭނާ ވަދެގެން ދިޔަ ސަބަބުގެ ގޮތުގައި އުބޭ މިއަދު ސިފަކުރަނީ މި ހާދިސާ އެވެ.

ކުޑައިރުއްސުރެން ދޮންބެ ގިޓާ ކުޅޭތަން ބަލައިގެން އެކަމަށް ޝައުގުވެރިކަން ވެސް އުފެދިފައި ހުއްޓެވެ. އޭރު އުޅުން ރައްޓެއްސެއްގެ ކައިރިން ގިޓާގެ ހުނަރު ތަރައްގީ ކުރި އެވެ. އެ ހުނަރު ކުރިއަރުވަން ދެން ވާގިވެރިޔަކަށްވީ ޓެކްނޮލޮޖީ އެވެ. އިންޓަނެޓެވެ. ޔޫޓިއުބްގެ ވީޑިއޯތަކެވެ.

"ވަރަށް ކުޑައިރުއްސުރެން ފެންނާނެ ދޮންބެ ގިޓާ ކުޅޭތަން، ދެން ދޮންބެ ކައިރީ އިންނަން، ދެން އަނެއްކާ ޕްލަސް ފްރެންޑަކާ، އޭނަ އަބަދުވެސް ގިޓާ، ކުޅޭތަން ފެންނާނެ، މިއުޒިކްގައި އެންމެ ފުރަތަމަ ދަސްކުރާ ހިތްވީ ވެސް ގިޓާ." 

ސްކޫލް ދައުރުގެ ވާހަކަތައް ވެސް ކިޔައިދިނެވެ. އެ ދުވަސްކޮޅު ވަރަށް މަޖާ ކަންކަން ވެސް ކުރެވުނު ކަން ފާހަގަ ކުރި އެވެ.

އެންމެ ގިނައިން ކޮށް އުޅޭ ކަމަކަށް ހަނދާންވަނީ ސްކޫލު އޮންނަ ދުވަސްތަކުގައި ރައްޓެހި ކުދިންނާއި އެކީ މޫދަށް ގޮސް ރާޅާ އެޅުން ކަމަށް އުބޭ ބުންޏެވެ.

އެހެން އުޅުމުގެ ތެރޭގައި ސުޕަވައިޒަރުގެ ރޫމްއަށް ވެސް ބައެއް ފަހަރު ގެންގޮސްފައި ހުންނާނެ ކަމަށް އޭނާ ކިޔައިދިނެވެ. މަނާ ކަމެއް ވިއްޔާ އޭރު ހަމަ ކޮންމެހެންވެސް ކޮށްލެވޭތޯ ބަލާކަން އޭނާގެ ވާހަކަތަކުން އެނގުނެވެ.

ސްކޫލްގައި އޭނާ ކިތަންމެ މަޖާކަންކަން ކޮށް އުޅުނެއް ކަމަކު ކިޔެވުމަށް ވެސް އެ ދޭން ޖެހޭ ސަމާލުކަމެއް ދިނެވެ. ތ. ވަންދޫ ސްކޫލްގެ ބެސްޓް އޯލް ރައުންޑް ހޯދި އެވެ. އަދި ސްކޫލްގެ ވައިސް ކެޕްޓަންގެ މަގާމު ވެސް އަދާކޮށްފަ އެވެ.

ޒުވާބު ކިޔުމުގެ ބައިގައި ވޯކަރލިސްޓެއް ގޮތުގައި ހުރުމަށްފަހު ފަހަރަކު ހަރުފަތެއް ގިރާކުރަމުން އައިސް މިވަގުތު ލީޑް  ވޯކަރލިސްޓެއް އަދި ލީޑް ގިޓަރިސްޓެއް ގޮތުގައި ބޮޑުބެރުގައި ވެސް އަދި ބޭންޑުގައި ވެސް މަސައްކަތް ކުރެ އެވެ. 

ރާއްޖޭގެ މިއުޒިކު އިންޑަސްޓްރީ އިން އުބޭ ފާހަގަކުރީ ފުރުސަތުތައް ވަރަށް ހަނި ކަމެވެ. ދާއިރާގައި އުޅޭ ގިނަ ކުދިން ފެންނަނީ ރިސޯޓް މިއުޒިކުން ކަމަށްވެސް އުބޭ ފާހަގަކުރިއެވެ.

"އަސްލު ބުނަންޔާ ރާއްޖޭގަ ވަރަށް ވަރަށް މަދު މިއުޒިޝަނުންނަށް ދީފަ އިންނަ އޮޕޮޗުއިނިޓީ.. އަނެއްހެން ބުނަންޔާ ގިނަ މިއުޒިޝަނުން ފެންނާނީ ރިސޯޓް ޕަރފޯމަންސް ތަކުން.."

އެހެން ނަމަވެސް ދިވެހި ރާއްޖޭގައި ހުނަރުވެރި މޮޅެތި ކުދިން އެބަ ތިބި ކަމަށާއި، ކުރިއަށް އޮތް ތަނުގަައި އެ ކުދިންނަށް ފުރުސަތުތައް ތަނަވަސް ވެގެން ދާނެ ކަމުގެ އުންމީދު އުބޭ ނަގައެެއް ނުލަ އެވެ. މިއުޒިކް ކެރިއަރުގައި އޭނާ ވެސް ދެމިހުރީ އެ އުންމީދުގެ މަތީގަ އެވެ.

އުބޭގެ މި ދަތުރުން ހާސިލް ކުރެވުނު ކާމިޔާބީ ތަކުގެ ވާހަކަތައް ހިއްސާ ކުރަމުން އުބޭ ވަނީ ހަބޭސްގެ އަލްބަމް ތަކުގައި މަސައްކަތް ކުރެވިފައި ހުންނާނެ ކަމަށް ބުނެފައެވެ.

އެގޮތުން "ކަނޑުރަސްގެފާނު" ލަވައިގެ މަސައްކަތް ވެގެން ދިޔައީ އެންމެ ހިތްހަމަޖެހޭ ގޮތަށް ކުރެވުން އަދި މީހުންގެ ތެރޭގައި ވަރަށް މަގުބޫލް ވެގެންދިޔަ ލަވައަކަށް ކަމަށްވެސް އުބޭ ބުންޏެވެ.

ދާއިރާއަށް ނިކުންނަން ބޭނުންވާ ކުދިންނަށް އުބޭ ވަނީ ދާއިރާއިން އުނގެނުމަށާއި، އުނގެނުނު ވަރަކަށް ދަސްވާނެ ކަމަށް ބުނެފައެވެ. އަދި ކުރަން ކެރިއްޖެއްޔާ ކޮންމެ ކަމެއްވެސް ކުރެވިދާނެ ކަމަށްވެސް އުބޭ ބުނެލިއެވެ.