ހަމްދާން އަހުމަދު ސަލީމް (26އ) އާންމު ނަމުންނަމަ (އައްނަ) އަކީ އެކަތި ބޮޑުބެރު ގުރޫޕުގެ މެނޭޖަރެވެ. ޒުވާން ޖޯޝާއި ފޯރީގައި ދިވެހި ބޮޑުބެރަށް މި ޒުވާނާ ނިކުމެ ހުރިތާ މިހާރު 8 އަހަރު ވެއްޖެއެވެ.

" ކުރިއަށް" ނޫހުން ގެނެސްދޭ "ފަންނުވެރިން" ގެ ސީރީސްއަށް ހަމްދާން ކިޔައިދިނީ ބޮޑުބެރަށް ހިތްދެވުނު ގޮތުގެ ވާހަކައެވެ. ބޮޑުބެރުގެ ދާއިރާއިން ކުރިއަށް ދާން ބޭނުންވެފައި ހުރި މިންވަރެވެ. ހަމްދާން އެ ދާއިރާއަށް ބޭނުންވާ ކުރިއެރުންތަކެވެ. 

ޝައުގުވެރިކަން އުފެދުނު ގޮތް:

ހއ.ތަކަންދޫއަށް އުފަން ޒުވާން ހަމްދާން ބޮޑުބެރަށް އަލެއް ނޫނެވެ. ހަމްދާން ސިފަ ކުރަނީ މީ އާއިލީ ކަމެއް ގޮތަށެވެ. ކާފަމެން މާމަމެންވެސް ބޮޑުބެރުގެ ތެރޭގައި އުޅުނު ކަމަށެވެ. ޝައުގުވެރިކަން އުފެދުނު ހިސާބަކީ އެއީ އެވެ. އާއިލާ ތެރެއިންނާއި، ރަށުގެ މީހުން ވެސް ފޯރިއާއި އެކު މިކަން ކުރާތީއެވެ. އެހިސާބުން ނިމުނީއެއް ނޫނެވެ. ބޮޑުބެރުގެ ލޯބި ފަހަރަކު ޖެނެރޭޝަންއަކުން ހަމްދާން އާއި ހިސާބަށް އައީއެވެ.

"ފެނޭހަމަ ކުރީގަވެސް ، އަންހެންވެރިންވެސް ފިރިހެންވެރިންވެސް  ހަމަ ކާފަމެން މާމަމެން އިރުން ފަށައިގެން ފެމެލީ ތެރޭގަވެސް އުޅޭނެ ހަމަ ބޮޑުބެރުގަ އުޅޭ މީހުން.. އޭރު ދެން ބޮޑަށް ނަށަނީ ފޯރިއަރައިގެން ގޮސް،" ހަމްދާން ކިޔައިދިނެވެ.

ބޮޑުބެރު ލަވަތައް އަޑުއިވޭއިރަށް ހަމްދާނަށް ހިމޭނަކުން ނުހުރެވެ އެވެ. ނުހުރެވިގެން ނަށަން ހަމަ ފެށެނީ އެވެ. މިހެން އުޅެނިކޮށް އައީ "ބޮޑުބެރު ޗެލެންޖް" އެވެ. ރާއްޖޭގައި ބޭއްވި އެފަދަ ފުރަތަމަ މުބާރާތުގައި ބައިވެރިވެވުނު ހިސާބުން އެ ކަމަށް އިތުރަށް ޝައުގު އުފެދިއްޖެ އެވެ. އޭގެ މިއުޒިކީ ދުނިޔެއަކަށް މީހާ ވަނީ އެވެ.

ގުރޫޕަށް ވަދެވުނުގޮތް:

"އެކަތި ބޮޑުބެރު" ގްރޫޕަށް ހަމްދާންއަށް ވަދެވިގެން އާދެވުނީ އެކުވެރިއެއްގެ ފަރާތުން ލިބުނު ފުރުސަތަކުންނެވެ.

މި ގްރޫޕްއަކީ އެންމެ ގާތް އެއް އެކުވެރިޔާގެ ރަށު ގުރޫޕެކެވެ. "އެކަތި ބޮޑުބެރު"ގްރޫޕް މާލެއަށް  ބަދަލުވީއިރު އެކުވެރިޔާގެ އެދުމަކަށް ދިޔައީ ބެރުވެރިއެއް ގޮތަށެވެ.

"[އެކުވެރިޔާ] އަފޫމެން ރަށުގައޮތް ގުރޫޕެއް ދޯ މީ އަސްލު. ދެން މާލެ ގުރޫޕް ޗޭންޖް ކުރިއިރު އަފޫ ބުނީ ހިނގާށޭ ބޮޑުބެރު ޖަހާލަން ދާން ގުރޫޕަށް، އަފޫ ތުރޫކޮށް މި ގުރޫޕަށް އާދެވުނީ،"

އޭރު ހަމްދާން އުޅުނީ ވެސް ގްރޭޑް ފަހެއްގައި ތައުލީމު ހާސިލް ކުރާށެވެ.

އާމްދަނީ:

ވަޒީފާގައި އުޅެމުން ވެސް ހަމްދާން ބޮޑުބެރު ޖެހުމަށް ދެވެން އޮތް ވަގުތެއް ދެވޭތޯ ވަރަށް މަސައްކަތް ކުރެއެވެ.  ހަމްދާން ސިފަކުރާ ގޮތުގައި ރަނގަޅަށް ޝޯތައް ހޯދަން މަސައްކަތް ކުރެވިއްޖެ ނަމަ ރަނގަޅު އާމްދަނީއެއްވެސް މީގެން ލިބެ އެވެ. 

"އެކަތި ބޮޑުބެރު" ގްރޫޕަކީ ޒުވާން ބެރުވެރިންގެ ގްރޫޕެކެވެ. މި ދިވެހި ސަގާފަތު ކުރިއަރުވަން ނިކުމެ ތިބީ ޒުވާން ޖޯޝާއި ފޯރީގައެވެ.

ހަމްދާން ކިޔައިދިން ގޮތުގައި ވެސް އެ ގްރޫޕްގައި މަސައްކަތް ކުރާ ހުރިހާ ޒުވާނުންނަކީ ވެސް ވަޒީފާ އަދާ ކުރާ މީހުންނެވެ.

މެނޭޖަރު ކަމުގެ މަގާމުގައި ހުރެ ހަމްދާންގެ ހިންގުންތެރިކަން ވަރަށް ފުރިހަމައެވެ. ގުރޫޕުގެ ކަންކަން ބަހާލައިގެން އެ ކުއްޖަކަށް އެންމެ ރަނގަޅަށް ކުރެވޭ ކަންކަން ހަވާލުކޮށްގެން ހަމްދާން މިކަން ކުރިއަށް ގެންދާ ކަމަށް ކިޔާދިނެވެ.

ވީޑިއޯ ލަވަ: 

ދެން ހަމްދާން ކިޔައިދިނީ ވީޑިވީއޯ ލަވައިގެ ތެރެއަށް ވަދެވިގެން އައި ގޮތުގެ ވާހަކައެވެ. 

ހަމްދާނުގެ ހަނދާންތައް ފުރަތަމަ ދިޔައީ 2017 ގެ ތެރެއަށެވެ. އެންމެ ފުރަތަމަ ނެރުނު ލަވަ އަކީ "ގޮމަ" އެވެ. ހަމްދާނަށް އެއީ، އޭރާއި ބަލާއިރު އެ މަސައްކަތަކީ ވަރަށް ރަނގަޅު މަސައްކަތެކެވެ. އެ ލަވައިގެ ތެރެއިން ދަސްވި އެއްޗެހި ވެސް ގިނަ ކަމަށް އޭނާ ބުންޏެވެ.

އޭގެ ފަހުން ވަރަށް ބައިވަރު ލަވަތަކުގެ "ކަވަރ"ތައް ލިބިފަ ހުރި ކަމަށާއި ބައިވަރު ލަވައިގައި މަސައްކަތްވެސް ކުރެވިފައި ހުންނާނެ ކަމަށް ހަމްދާން ކިޔައިދިނެވެ. ބައެއް ލަވަ ތަކަކީ ހުސް ބޮޑުބެރު ލަވަތައް ކަމަށާއި ބައެއް އެއްޗެއްސަކީ މިއުޒިކު "ފިއުޝަން" އެއްޗެހި ކަމަށެވެ. 

އެންމެ ހިތްހަމަ ޖެހޭ ލަވަ:

އެންމެ ހިންހަމަޖެހޭ މަސައްކަތަކަށް ހަމްދާން ފާހަގަކުރީ މި ފަހުން މުޅި ރާއްޖޭގައިވެސް މަޝްހޫރުވެގެން ދިޔަ އެއް ލަވައެވެ. "މަރިޔަމް މަލާ" މި ލަވައެވެ.

"މަރިޔަމް މަލާ" ލަވައިގެ މަސައްކަތަކީ ވަރަށް ބުރަ މަސައްކަތެއް ކަމަށް ހަމްދާން ފާހަގަ ކުރިއެވެ. މިލަވަ ބެލުންތެރިންނާއި ހިސާބަށް ދޫކޮށްލުމުގެ ކުރިން މި ލަވައިން ކުރީގެ ދިވެހިން އުޅުނު ދިރިއުޅުމަށް ބޮޑުބެރުގެ ތެރެއިން ގެންގޮސްދޭނެ ކަމުގެ ވާހަކަވެސް ބުނެވިފައި އޮންނާނެ ކަމަށް ހަމްދާން ކިޔައިދިނެވެ.

ބ.ތުޅާދޫގައި މަންޒަރުތައް ނަގައިފައި އެހުރީ އެހެންވެގެން ކަމަށާއި، ވަރަށް ގިނަ ރަށްތައް ބަލަމުންގޮސް ލަވައިގެ މަންޒަރުތައް ނަގަން އެންމެ ކަމުދިޔަ ލޮކޭޝަންއަކީ އެއީކަމަށް ހަމްދާން ކިޔައިދިނެވެ.

ލޯބީގެ ލަވައަކަށް މި ލަވަ ވެގެންދިޔައީ ލޯބިވެރިންގެ ދުވަހަށް ހާއްސަކޮށް ނެރުނު ލަވައަކަށްވެފައި ލަވައިގެ ލިރިކްސް ގައިވެސް ލޯބީގެ އިހުސާސްތަކެއް ގެނެސްދީފައި ވާތީކަމަށް ހަމްދާން ކިޔައިދިނެވެ. ނަމަވެސް އެންމެ ބޮޑަށް ބެލީ ކުރީގެ ލަވަތައް އަޑުއަހާއިރު އެ ގެނެސްދެވޭ އިހުސާސް ގެނެސްދިނުން ކަމަށް ހަމްދާން ފާހަގަކުރިއެވެ. 

ލަވައިގެ މަސައްކަތް 2 ދުވަސްތެރޭގައި ނިންމާލެވުނު ކަމަށްވެސް ހަމްދާން ބުނެފައިވެއެވެ.

ދަތިވާ ކަންކަން:

ހަމްދާން ފާހަގަ ކުރީ މިކަމުގެ ތެރޭގައި އުޅޭއިރު ދަތިވާ އެންމެ ބޮޑު ކަމަކީ "ފައިނޭންޝިއަލީ" އަދި ތަނުގެ ގޮތުންނާއި ސްޕޮންސާރސްގެ ދަތިކަން ކަމަށެވެ. ސަބަބަކީ ތަންތަން ކުއްޔަށް ނަގައިގެން އުޅޭއިރު ދަތިވާ ކަމަށެވެ.

ފުރުސަތުތަކަށް ބަލާއިރު ވެސް ފުރުސަތުތައް ވެސް ލިބުން ދަތިވާ ކަމަށެވެ. އަމިއްލައަށް ފުރުސަތުތައް ހޯދަން ގިނަ މަސައްކަތްތައް ކުރަންޖެހޭ ކަމަށްވެސް ހަމްދާން ކިޔައިދިނެވެ.

ދެކެން ބޭނުންވާ ދުވަސް:

ބޮޑުބެރު ދާއިރާގައި ހަމްދާން އެންމެ ދެކެން ބޭނުންވާ ދުވަހަކީ ބޮޑުބެރު "އެސޯސިއޭޝަން" އެއް ތައާރަފް ކުރާނެ ދުވަހެވެ.

ހަމްދާން އެދެނީ އެހެނިހެން އެސޯސިއޭޝަންތައް ގާއިމްކުރެވިފައިވާ އުސޫލުން ބޮޑުބެރަށް ވެސް އެފަދަ ތަނެއް ތައާރަފްކުރުމެވެ. ބޮޑުބެރުގައި އުޅޭ އެންމެން އެއްވެގެން މަޝްވަރާ ކުރެވޭ ފަދަ ޕްލެޓްޕޯމެއް ގާއިމުކުރުމެވެ. ބެރުވެރިންގެ ޖަމިއްޔާއެއް އޮވެގެން، ބެރުވެރިންގެ ހައްގުތަކަށް އަޑުއުލާނެ މައި މަރުކަޒެއް އޮންނަން އެބަ ޖެހެ އެވެ.

އުމުރުގެ ގޮތުން އެކަތި ބޮޑުބެރު ގުރޫޕް ޅަ ވިޔަސް ސަގާފަތާއި ހުނަރުގެ ގޮތުން އެއީ އެހާ ޅަ ގްރޫޕެއް ނޫން ކަމަށް ހަމްދާން ސިފަކުރިއެވެ. ހަމަ ގައިމު ވެސް ސަގާފަތާއި ބޮޑުބެރަށް އަލެއް ނުވާނެކަމަށް ހަމްދާން ބުނެލީ ހިނިތުންވުމަކާއި އެކުއެވެ. 

އައިޑަލްސް/އިންސްޕިރޭޝަން: 

މި ދާއިރާގައި ބެރުވެރިއެއް ގޮތުން ހަމްދާންއަށް އެންމެ ކަމުދަނީ "ކައިރޭ" ކަމަށް ހަމްދާން ފާހަގަކުރެއެވެ. ބޮޑުބެރުގެ ލަވަ ކިޔުމުގައި އެންމެ ކަމުދަނީ "މަންޑޭ" ކަމަށާއި ނެށުމުގެ ތެރެއިން ކަމުދަނީ މަހިބަދޫގައި އޮންނަ "ޑަޑޫރާ" ކިޔާ ބޮޑުބެރު ގުރަޫޕަކަށް ނަށާ "ހުސެއިން ނިޒާރު" ކިޔާ ބޭފުޅެއްގެ އިތުރުން ބާރަށު ބޮޑުބެރު ޓީމެއް ކަމަށްވާ "މަންދީރާ" ކިޔާ ބޮޑުބެރު ގުރޫޕެއްގައި އުޅޭ ނެށުންތެރިއެއް ކަމަށެވެ.

ބޮޑުބެރާއި ދުރަށް ގޮސްފާނެތަ؟ 

ހަމްދާން ބުނާގޮތުން ބޮޑުބެރާއި ދުރަށް ދާނެކަމަށް ހީއެއް ނުވެއެވެ.

ސިއްހީގޮތުން ކަމެއް ދިމާނުވާހާ ހިނދު މި ދާއިރާއާ ދުރަށް ހަމްދާން ނުދާނެ ކަމަށް އޭނާ ތަކުރާރުކޮށް އިންޓަވިއުގައި ބުނެފައިވެއެވެ.  

އާންމު ދިރިއުޅުމުގަ އެހެން ކަންކަމުގެ އިތުރުން މި ކަމަކީވެސް ކުރާކަމެއްކަން ހަމްދާން ފާހަގަކުރެއެވެ.

ކުރިއަށްދާން ބޭނުންވާ ޒުވާނުންނަށް:

ބޮޑުބެރު ދާއިރާ އަދި ސަގާފީ ކުޅިވަރު ދިރުވާ އާލާކުރާ ކުދިންނަށް ހަމްދާން ބުނެލީ މިކަން ހުއްޓާނުލާ ކުރިއަށް ގެންދިއުމަށެވެ. ބައިވަރު އުނދަގޫތައް ކުރިމަތިވި ނަމަވެސް ކުރިއަށް ދެވޭނީ މަސައްކަތް ކޮށްގެން ކަމަށަވެސް ހަމްދާން ބުނެލިއެވެ. ދަސްކުރުމަށް ރަށްރަށަށް ގޮސް މާހިރުން ކައިރިން އޮޅުންފިލުވައިގެން ކުރިއަށްދެވޭނެ ކަމަށް ހަމްދާން ބުނެލިއެވެ. ބޭނުންވާނީ ކެއްތެރި ކަމަކާއި  ގަދައަޅާ މަސައްކަތް ކުރުން ކަމަށް ހަމްދާން ބުނެފައިވެއެވެ. 

ފޭނުންނަށް:

ހަމްދާންވަނީ މިވީ ހުރިހާ ދުވަހަކު ދެގޮތެއްނުވެ ތިބި ސަޕޯޓަރުންނާއި ފޭނުންނަށް ޝުކުރު އަދާކޮށްފަ އެވެ.

ސަޕޯޓަރުންނާއި ވީހާ ވެސް ކައިރިން ކަންކަން ކުރެވޭތޯ މިހާރު ވަރަށް މަސައްކަތް ކުރާކަމަށް ހަމްދާން ކިޔައިދިނެވެ. 

ކޮމިއުނިޓީ ޗެނެލްއެއް ވެސް ހުޅުވާ އޭގައި ވެސް ކުރިއަށް ހުރި ކަންތައްތަކުގެ ވާހަކަ ހިއްސާކުރަމުން ދާ ވާހަކަ ހަމްދާން ބުންޏެވެ.

ނިންމާލަމުން ހަމްދާން ވަނީ އެންމެ ފަހުގެ މަސައްކަތް"މަރިޔަމް މަލާ" ގެ މަސައްކަތަށް ފަހު އަދިވެސް ރަނގަޅު މަސައްކަތް ތަކެއް ނެރޭނެ ކަމުގެ ޔަގީންކަން ސަޕޯޓަރުންނަށް އަރުވާފައެވެ. ހަމްދާން އެދެނީ ދެގޮތެއްނުވެ އަބަދުވެސް "އެކަތި ބޮޑުބެރު ގުރޫޕް" އަދި ހަމްދާންއާއި އެކު ތިބުމަށެވެ.