ދިވެހި ފުޓުބޯޅަ އިންގިލާބުކޮށްލި ނަން މަޝްހޫރު ކޯޗު އިހުސާން އަބްދުލް ގަނީ (ސާންތީ) ގެ ހަނދާނުގައި ކުޅިވަރު ވުޒާރާއިން ތައުޒިޔާގެ ދަފްތަރެއް ހުޅުވައިފިއެވެ.

ކުޅިވަރު ވުޒާރާއިން މިއަދު ބޭއްވި ރަސްމިއްޔާތުގައި ތައުޒިޔާގެ ދަފްތަރު ހުޅުވައިދެއްވީ ކުޅިވަރު ވަޒީރު އަބްދުﷲ ރާފިއުއެވެ. ކޯޗު ސާންތީގެ އާއިލާގެ މެންބަރުންނާއި، ކުޅިވަރުގެ ޚިދުމަތްތެރިންނާއި، ފުޓްބޯޅަ ކުޅުންތެރިން ވެސް އެ ރަސްމިއްޔާތުގައި ބައިވެރިވި އެވެ.

އުމުރުން 51 އަހަރުގައި ސާންތީ ނިޔާވީ ކެންސަރު ބައްޔަށް، ޓްރީޓޮޕް ހޮސްޕިޓަލުގައި ފަރުވާދެމުން ދަނިކޮށް މިދިޔަ ހޮނިހިރު ދުވަހުގެ ރެއެވެ.

ސާންތީގެ ނަން ދިވެހި ފުޓުބޯޅައިގައި ވިދާލާފައި އޮންނަނީ ކުޅުންތެރިން ބިނާކޮށް، ކްލަބްތައް ވަރުގަދަކޮށްދޭ ކޯޗެއް ގޮތަށެވެ. އާދައިގެ ކްލަބެއްގެ ގޮތުގައި އޮތް ކްލަބް އީގަލްސް ކޮޅަށް ޖަހައި ނަގައިދިން މޭސްތިރިއަކީ ސާންތީއެވެ. 

ގައުމީ ފުޓްބޯޅަ ޓީމުގެ އެސިސްޓަންޓް ކޯޗުގެ މަގާމުގައި 2001 އިން 2008 އަށް މަސައްކަތްކުރި ސާންތީއަކީ 2008 ގައި ރާއްޖޭން ސާފް ޗެމްޕިއަންޝިޕް ކާމިޔާބުކުރި ޓީމުގެ ކޯޗު ޔަންކޭޒު އެންމެ އިތުބާރުކުރި އެސިސްޓެންޓެވެ.

ސާންތީގެ ހަގީގީ މަގުބޫލުކަމެއް ކްލަބް އީގަލްސްގެ ކޯޗުގެ މަގާމުންނެވެ. 2011 އިން 2017އަށް އީގަލްސްގެ ކޯޗު ކަމުގައި، ޒުވާން ކުޅުންތެރިން އުފައްދައި ވަރުގަދަ ޓީމެއް ބިނާކުރި އެވެ.

ފުރަތަމަ ޑިވިޝަނަށް އީގަލްސް ގެންގޮސްދީ، ޕްރެސިޑެންޓް ކަޕްގެ ފައިނަލަށް ތިން ފަހަރު ދަތުރުކޮށް، އެއް ފަހަރު ތަށި ނެގި އެވެ. އެއީ އީގަލްސްގެ ތާރީހުގައި ކުރިން ދުވަހަކު ވެސް ހޯދިފައިނުވާ ބޮޑެތި ކާމިޔާބީތަކެވެ.

އެ ކްލަބުގެ ކޯޗުގެ މަގާމުން ވަކިވުމަށް ފަހު ސާންތީ ވަނީ އެފްއޭއެމްގެ ޓެކްނިކަލް ޑިރެކްޓަރުގެ މަގާމުު، 19 އަހަރުން ދަށުގެ ގައުމީ ޓީމުގެ ހެޑް ކޯޗުކަން ކޮށްފަ އެވެ. ދެން ކްލަބު އޭދަފުށީގެ ކޯޗުކަން، އޭގެ ފަހުން ޔުނައިޓެޑް ވިކްޓްރީއަށް ކޯޗުކަން ކުރި އެވެ.

ސާންތީ އަލުން އީގަލްސްގެ ކޯޗުކަމާ ހަވާލުވީ 2023 ވަނަ އަހަރުގެ ފެބްރުއަރީ މަހު އެވެ. އެކަމަކު ބަލި ހާލަތު ހުރި ގޮތުން އެ އަހަރުގެ ޖޫން މަހު ކޯޗުކަމުން ސާންތީ ވަކިވި އެވެ. އެއަށް ފަހު ފުޓްބޯޅައިގެ ރަސްމީ މަގާމެއް އޭނާ އަދާއެއް ނުކުރެ އެވެ.

ސާންތީ ނިޔާވުމުގެ ކުރިއަށް އޭނާގެ ކޯޗިން ކެރިއަރު ނިންމާލީ އަބަދުވެސް އެ ކެރިއަރު ނިންމާލަން ބޭނުންވި، އޭނާގެ ފުޓުބޯޅަ ހަޔާތުގެ 'ގޯތި' ނުވަތަ 'ހޯމް' ކަމުގައި ދެކޭ ކްލަބް އީގަލްސް އިންނެވެ.