މި އަހަރުވެސް މާލެ ސަރަހައްދުގައި ކުލަގަދަކޮށް އީދު ފާހަގަކުރުމަށް "ސާދަ އެެންޓަޓެއިންމެންޓް" އިން ސަގާފީ ފެސްޓިވަލެއް ބާއްވަން ނިންމައިފި އެވެ. 

މާލެ ސިޓީ ކައުންސިލާ ގުޅިގެން ސާދަ އެންޓަޓެއިންމެންޓުން ކުރިއަށްގެންދާ މި ހަރަކާތުގެ ތެރެއިން، ކުޑަކުދިންނަށް ހާއްސަ ހަވީރާއި ބޮޑު މަސް ދުއްވުން ވެންޑާ ސްޓޯލްސް އަދި ރޭގަނޑުގެ މިއުޒިކް ސްޓޭޖް ޝޯ ކުރިޔަށް ގެންދިއުމަށް ވަނީ ހަމަޖެހިފަ އެވެ. އަދި ސައިޑް އިވެންޓުތަކެއްވެސް މި ހަރަކާތްތަކުގެ ތެރެއިން ސަގާފީ ފެސްޓިވަލުގައި ކުރިއަށް ގެންދާނެ އެވެ.

މާލިއާއި ބޮޑު މަސް ދުއްވުން އަދި ބޮޑު ބެރުގެ ހަރަކާތްތައް ކުރިއަށް ގެންދާނީ ރަސްފަންނު ސަރަހައްދުން އާޓިފިޝަލް ބީޗަށް ނިންމާ ގޮތަށެވެ. 

މަގުބޫލު އެކި ބޭންޑުތަކާއި، މިއުޒިކް ގުރޫޕުތަކާއި މަޝްހޫރު ފަންނާނުން ފެނިގެންދާނެ މިއުޒިކް ޝޯ ބޭއްވުމަށް ހަމަކެހިފައި ވަނީ އާޓިފިޝަލް ބީޗުގަ އެވެ. ސާދަ އެންޓަޓެއިންމަންޓުން ނިންމާފައި ވަނީ މި ޝޯ އީދު ތިން ރޭ ވެސް ކުރިއަށް ގެންދިއުމަށެވެ.

ސާދަ އެންޓަޓެއިންމެންޓުން ފިތުރު އީދު ފާހަގަކުރުމަށް ކުރިއަށް ގެންދާ މި ހަރަކާތްތައް ފަށާނީ މި މަހުގެ 31 ގަ އެވެ. މި ހަރަކާތްތައް ތިން ދުވަހުގެ މުއްދަތަށް ކުރިއަށް ގެންދިއުމަށް ވަނީ ނިންމާފަ އެވެ.  

މި އިވެންޓުތައް ކުރިއަށްދާ ވަގުތުތަކުގައި ވިޔަފާރި ސްޓޯލްތައް ޖެހުމަށް ވެސް ސާދަ އެންޓަޓެއިންމެންޓުން ވަނީ ނިންމާފަ އެވެ. ސްލޮޓެއް ބުކް ކުރުމަށް ގުޅަން ޖެހޭ ނަމްބަރަކީ 9990333 އެވެ.

މާލެ ސިޓީ ކައުންސިލުގެ އެއްބާރުލުމާ އެކު ކުރިއަށް ގެންދާ މި ސަގާފީ ފެސްޓިވަލުގެ ޓައިޓަލް ސްޕޮންސަރަކީ ހޮންޑާ އެވެ.

މިދިޔަ އަހަރުވެސް ސާދަ އެންޓަޓެއިންމަންޓުން މާލޭގައި މިފަދަ ހަރަކާތްތަކެއް ކުރިއަށް ގެންދިޔަ އެވެ. އެ ހަރަކާތްތަކަށްވެސް އާންމުންގެ ބޮޑު ތާއީދެއް ލިބިގެން ގޮސްފައިވެއެވެ.