ރޯދަ މަހަށް ވަކި ކަރަންޓު ބިލެއް ތައްޔާރުކުރުމަށް މިމަހު 16 އަދި 17ގައި ރީޑިން ނަގަން ސްޓެލްކޯ ނިންމައިފި އެވެ.

ރޯދަ މަހު ޑޮމެސްޓިކް ރޭޓުން ބިލްކުރާ ކޮންމެ ބިލަކަށް ގިނަވެގެން ނަގާނީ 400 ރުފިޔާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެ ކުރިން ވިދާޅުވެފައިވާއިރު ސްޓެލްކޯ އިން މިއަދު ބުނީ ރޯދަ މަހުގެ ކަރަންޓު ބިލު 400 ރުފިޔާއަށްވުރެ ބޮޑު ނުވާނެހެން ޑިސްކައުންޓް ދިނުމަށް ރައީސް މުއިއްޒު ނިންމަވާފައިވާތީ ރޯދަ މަހަށް ވަކި ބިލެއް ތައްޔާރުކުރުމަށް ރީޑިން ނެގުމުގެ މަސައްކަތް މިމަހުގެ 16 އަދި 17 ވަނަ ދުވަހު ކުރިއަށްދާނެ ކަމަށެވެ.

އެ ކަމުގައި ހުރިހާ ކަސްޓަމަރުން އެއްބާރުލުން ދިނުމަށްވެސް ސްޓެލްކޯ އެދިފައިވެ އެވެ. މިދިޔަ ރޯދަ މަހު ވެސް ކަރަންޓާއި ފެން ބިލުން ސަރުކާރުން ޑިސްކައުންޓު ދީފައިވެ އެވެ. 

ކަލަންޑަރުގައިވާ ގޮތުން ރޯދަ މަހުގެ ފުރަތަމަ ދުވަހަކީ މި މަހުގެ 18 ވަނަ ދުވަހު އެވެ.