ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ޖަލްސާތައް ފެށުމުގެ ގޮތުން މާދަމާ އިއްވުމަށް ހަމަޖެހިފައިވާ ރިޔާސީ ބަޔާނާ ގުޅިގެން މާލޭގެ ބައެއް މަގުތައް ބަންދުކުރުމަށް ފުލުހުން ވަނީ ނިންމާފައެވެ.

ފުލުހުން މިރޭ "އެކްސް" މެދުވެރިކޮށް ހާމަކުރި މައުލޫމާތުގައިވާ ގޮތުން، މަޖިލިސް އިދާރާ ހިމެނޭ ސަރަހައްދުގެ ޓްރެފިކް ފްލޯއަށް ބަދަލުގެނައުމަށް ނިންމާފައިވަނީ ރައީސުލްޖުމްހޫރިއްޔާ ރިޔާސީ ބަޔާން އިއްވަވައި ދެއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ޖަލްސާއާ ގުޅިގެންނެވެ. މި ގޮތުން ބަންދުކުރެވޭ މަގުތަކުގެ ތެރޭގައި ޖުމްހޫރީ މައިދާނާއި މަޖީދިއްޔާ ސްކޫލާ ދެމެދުގައި ހުރި މަގުތައް ހިމެނެއެވެ.

 

ފުލުހުން ދެއްވި މައުލޫމާތުގައިވާ ގޮތުން މަގުތައް ބަންދުކުރުން ފެށުމަށް ހަމަޖެހިފައިވަނީ މާދަމާ ހެނދުނު 7:00 އިން ފެށިގެން ޖަލްސާ ނިމެންދެނެވެ. އަދި ރިޔާސީ ބަޔާން އިއްވުމަށް ހަމަޖެހިފައިވާ ޖަލްސާ ފެށުމަށް ހަމަޖެހިފައިވަނީ ހެނދުނު 9:00 ގައެވެ.

ފާހަގަކޮށްލެވޭ ކަމަކީ މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު ރިޔާސީ ބަޔާން އިއްވަވާ ދެވަނަ ފަހަރު ކަމެވެ. މި ފަދަ ޖަލްސާތަކުގައި އާންމު ގޮތެއްގައި ސަލާމަތީ ކަންކަމަށް ޚާއްސަ ސަމާލުކަމެއް ދެވެއެވެ.