ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބާއްވަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފި އެވެ. 

ކޮމިޓީން ނިންމި ގޮތް ފާސްވާނީ މަޖިލީހުގެ ތަޅުމުގައި ނަގާ ވޯޓަކުންނެވެ.

މަޖިލީހުގެ މެޖޯރިތީ ލީޑަރު އިބްރާހިމް ފަލާހް ހުށަހެޅުއްވި ބިލުގައިވަނީ ހިނގަމުންދާ މަޖިލީހުގެ ދައުރު 1 ޑިސެމްބަރު 2028އަށް ކުރުކުރުމަށެވެ. 

ހިނގަމުންދާ 20ވަނަ މަޖިލީހުގެ ދައުރު ހަމަވަނީ މެއި 2029ގަ އެވެ. ދައުރު ކުރުކުރަނީ ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަށެވެ. 

މަޖިލީހުގެ ދައުރު ކުރުކުރާތީ މި ކަމުގައި ރައްޔިތުންގެ ފެންނަ ގޮތް ބަލަން ވޯޓެއް ނަގަން ޖެހެ އެވެ. އެ ކަން ތަންފީޒުވާނީ ރައްޔިތުންގެ އަގުލަބިއްޔަތު ލިބިގެނެވެ.

ސަރުކާރުން ނިންމާފައިވަނީ އަންނަ ލޯކަލް ކައުންސިލްތަކުގެ އިންތިހާބާއެކު މި ކަމުގެ ފެންނަ ނުފެންނަ ވޯޓެއް ނެގުމަށެވެ.