ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބާއްވަން ޖެހޭ ގޮތަށް ގާނޫނުއަސާސީ އިސްލާހުކުރަން މަޖިލީހުން މިއަދު ފާސްކޮށްފި އެވެ. 

މަޖިލީހުގެ މެޖޯރިޓީ ލީޑަރު އިބްރާހިމް ފަލާހް ހުށަހެޅުއްވި ބިލު މަޖިލީހުން ފާސްކުރީ 72 ވޯޓުންނެވެ. ފާސްކުރުމާ ދެކޮޅަށް ވޯޓު ދެއްވީ އެންމެ މެންބަރެކެވެ. 

އެ ބިލުގައިވަނީ ހިނގަމުންދާ މަޖިލީހުގެ ދައުރު 1 ޑިސެމްބަރު 2028އަށް ކުރުކުރުމަށެވެ. 

ހިނގަމުންދާ 20ވަނަ މަޖިލީހުގެ ދައުރު ހަމަވަނީ މެއި 2029ގަ އެވެ. ދައުރު ކުރުކުރަނީ ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަށެވެ. 

މަޖިލީހުގެ ދައުރު ކުރުކުރާތީ މި ކަމުގައި ރައްޔިތުންގެ ފެންނަ ގޮތް ބަލަން ވޯޓެއް ނަގަން ޖެހެ އެވެ. އެ ކަން ތަންފީޒުވާނީ ރައްޔިތުންގެ އަގުލަބިއްޔަތު ލިބިގެނެވެ.

ސަރުކާރުން ނިންމާފައިވަނީ އަންނަ ލޯކަލް ކައުންސިލްތަކުގެ އިންތިހާބާއެކު މި ކަމުގެ ފެންނަ ނުފެންނަ ވޯޓެއް ނެގުމަށެވެ.